dard-e-dil

dard hai dil ke liye aur dil insāñ ke liye

tāzgī barg-o-samar kī chamanistāñ ke liye

sāz-e-āhañg-e-junūñ tār-e-rag-e-jāñ ke liye

be-ḳhudī shauq kī be-sar-o-sāmāñ ke liye

kyā kahūñ kaun havā sar meñ bharī rahtī hai

be piye āTh-pahr be-ḳhabarī rahtī hai

na huuñ shā.ir na valī huuñ na huuñ ejāz-e-bayāñ

bazm-e-qudrat meñ huuñ tasvīr kī sūrat hairāñ

dil meñ ik rañg hai lafzoñ se jo hotā hai ayaañ

lai kī muhtāj nahīñ hai mirī fariyād-o-fuġhāñ

shauq-e-shohrat havas-e-garmī-e-bāzār nahīñ

dil vo yūsuf hai jise fikr-e-ḳharīdār nahīñ

aur hoñge jinheñ rahtā hai muqaddar se gilā

aur hoñge jinheñ miltā nahīñ mehnat kā silā

maiñ ne jo ġhaib kī sarkār se māñgā vo milā

jo aqīda thā mire dil kā hilā.e na hilā

kyuuñ Darāte haiñ abas gabrū musalmāñ mujh ko

kyā miTā.egī bhalā gardish-e-daurāñ mujh ko

kyā zamāna pe khule be-ḳhabarī kā mirī raaz

tā.ir-e-fikr meñ paidā to ho itnī parvāz

kyuuñ tabī.at ko na ho be-ḳhudī-e-shauq pe naaz

hazrat-e-abr ke qadmoñ pe hai ye farq-e-niyāz

faḳhr hai mujh ko usī dar se sharaf paane kā

maiñ sharābī huuñ usī riñd ke maiḳhāne kā

dil mirā daulat-e-duniyā kā talabgār nahīñ

ba-ḳhudā ḳhāk-nashīnī se mujhe aar nahīñ

mast huuñ hubb-e-vatan se koī mai-ḳhvār nahīñ

mujh ko maġhrib kī numā.ish se sarokār nahīñ

apne hī dil kā piyāla piye mad.hosh huuñ maiñ

jhūTī piitā nahīñ maġhrib kī vo mai-nosh huuñ maiñ

qaum ke dard se huuñ soz-e-vafā kī tasvīr

merī rag rag se hai paidā tap-e-ġham kī tāsīr

hai magar aaj nazar meñ vo bahār-e-dil-gīr

kar diyā dil ko farishtoñ ne tarab ke tasḳhīr

ye nasīm-e-saharī aaj ḳhabar laa.ī hai

saal guzrā mire gulshan meñ bahār aa.ī hai

qaum meñ aaTh baras se hai ye gulshan shādāb

chehra-e-gul pe yahāñ pās-e-adab kī hai naqāb

mere ā.īna-e-dil meñ hai faqat is kā javāb

us ke kāñToñ pe kiyā maiñ ne nisār apnā shabāb

kaam shabnam kā liyā dīda-e-tar se apne

maiñ ne sīñchā hai use ḳhūn-e-jigar se apne

har baras rañg pe aatā hī gayā ye gulzār

phuul tahzīb ke khilte ga.e miTte ga.e ḳhaar

pattī pattī se huā rañg-e-vafā kā iz.hār

naujavānān-e-chaman ban ga.e tasvīr-e-bahār

rañg-e-gul dekh ke dil qaum kā dīvāna huā

jo thā bad-ḳhvāh-e-chaman sabza-e-begāna huā

bū-e-naḳhvat se nahīñ yaañ ke guloñ ko sarokār

hai buzurgoñ kā adab in kī javānī kā siñgār

ilm-o-īmāñ kī tarāvat kā diloñ meñ hai guzār

dho ga.e chashma-e-aḳhlāq se sīnoñ ke ġhubār

rañg dikhlātī hai yuuñ dil kī safā yāroñ meñ

raushnī sub.h kī jis tarah ho gulzāroñ meñ

kis ko ma.alūm thī is gulshan-e-aḳhlāq kī raah

maiñ ne phūloñ ko kiyā rañg-e-vafā se āgāh

ab to is baaġh pe hai sab kī mohabbat kī nigāh

jo ki paude the shajar ho ga.e māshā-allāh

kyā kahūñ rañg-e-javānī meñ jo is raag ke the

bāġhbāñ ho ga.e gulchīñ jo mere baaġh ke the

go ki baaqī nahīñ kaifiyyat-e-tūfān-e-shabāb

phañs ke janjāl meñ duniyā ke ye qissa huā ḳhvāb

mast rahtā hai magar ab bhī dil-e-ḳhāna-ḳharāb

shaam ko baiTh ke mahfil meñ luñDhātā huuñ sharāb

nashsha-e-ilm kī ummīd pe jiine vaale

simaT aate haiñ sar-e-shām se piine vaale

aur hī rañg pe hai aaj bahār-e-gulshan

sair ke vāste aa.e haiñ azīzān-e-vatan

farsh āñkheñ kiye baiThe haiñ javānān-e-chaman

dil meñ tūfān-e-tarab lab pe mohabbat ke suḳhan

kaun hai aaj jo is bazm meñ masrūr nahīñ

rūh-e-sarshār bhī khiñch aa.e to kuchh duur nahīñ

magar afsos ye duniyā hai maqām-e-ibrat

rañj kī yaad dilātā hai ḳhayāl-e-rāhat

aaj yaad aatī hai un phūloñ kī mujh ko sūrat

khilte hī kar ga.e jo mere chaman se rehlat

chashm-e-bad-dūr guloñ kī ye bharī Daalī hai

chand phūloñ kī magar is meñ jagah ḳhālī hai

ye vo gul the jinheñ arbāb-e-nazar ne royā

bhaa.ī ne bahnoñ ne mādar ne pidar ne royā

ḳhaak ronā thā jo is dīda-e-tar ne royā

muddatoñ in ko mire qalb-o-jigar ne royā

dil ke kuchh dāġh-e-mohabbat haiñ nishānī un kī

bachpanā dekh ke dekhī na javānī un kī

ḳhair duniyā meñ kabhī soz hai aur kabhī hai saaz

naunihālān-e-chaman kī rahe ab umr darāz

bhaa.ī se baḌh ke mujhe haiñ ye mere māya-nāz

mere monis haiñ yahī aur yahī mere hamrāz

mar ke bhī ruuh mirī dil kī tarah shaad rahe

maiñ rahūñ yā na rahūñ ye chaman ābād rahe

dard hai dil ke liye aur dil insan ke liye

tazgi barg-o-samar ki chamanistan ke liye

saz-e-ahang-e-junun tar-e-rag-e-jaan ke liye

be-KHudi shauq ki be-sar-o-saman ke liye

kya kahun kaun hawa sar mein bhari rahti hai

be piye aaTh-pahr be-KHabari rahti hai

na hun shair na wali hun na hun ejaz-e-bayan

bazm-e-qudrat mein hun taswir ki surat hairan

dil mein ek rang hai lafzon se jo hota hai ayan

lai ki muhtaj nahin hai meri fariyaad-o-fughan

shauq-e-shohrat hawas-e-garmi-e-bazar nahin

dil wo yusuf hai jise fikr-e-KHaridar nahin

aur honge jinhen rahta hai muqaddar se gila

aur honge jinhen milta nahin mehnat ka sila

main ne jo ghaib ki sarkar se manga wo mila

jo aqida tha mere dil ka hilae na hila

kyun Daraate hain abas gabru musalman mujh ko

kya miTaegi bhala gardish-e-dauran mujh ko

kya zamana pe khule be-KHabari ka meri raaz

tair-e-fikr mein paida to ho itni parwaz

kyun tabiat ko na ho be-KHudi-e-shauq pe naz

hazrat-e-abr ke qadmon pe hai ye farq-e-niyaz

faKHr hai mujh ko usi dar se sharaf pane ka

main sharabi hun usi rind ke maiKHane ka

dil mera daulat-e-duniya ka talabgar nahin

ba-KHuda KHak-nashini se mujhe aar nahin

mast hun hubb-e-watan se koi mai-KHwar nahin

mujh ko maghrib ki numaish se sarokar nahin

apne hi dil ka piyala piye madhosh hun main

jhuTi pita nahin maghrib ki wo mai-nosh hun main

qaum ke dard se hun soz-e-wafa ki taswir

meri rag rag se hai paida tap-e-gham ki tasir

hai magar aaj nazar mein wo bahaar-e-dil-gir

kar diya dil ko farishton ne tarab ke tasKHir

ye nasim-e-sahari aaj KHabar lai hai

sal guzra mere gulshan mein bahaar aai hai

qaum mein aaTh baras se hai ye gulshan shadab

chehra-e-gul pe yahan pas-e-adab ki hai naqab

mere aaina-e-dil mein hai faqat is ka jawab

us ke kanTon pe kiya main ne nisar apna shabab

kaam shabnam ka liya dida-e-tar se apne

main ne sincha hai use KHun-e-jigar se apne

har baras rang pe aata hi gaya ye gulzar

phul tahzib ke khilte gae miTte gae KHar

patti patti se hua rang-e-wafa ka izhaar

naujawanan-e-chaman ban gae taswir-e-bahaar

rang-e-gul dekh ke dil qaum ka diwana hua

jo tha bad-KHwah-e-chaman sabza-e-begana hua

bu-e-naKHwat se nahin yan ke gulon ko sarokar

hai buzurgon ka adab in ki jawani ka singar

ilm-o-iman ki tarawat ka dilon mein hai guzar

dho gae chashma-e-aKHlaq se sinon ke ghubar

rang dikhlati hai yun dil ki safa yaron mein

raushni subh ki jis tarah ho gulzaron mein

kis ko malum thi is gulshan-e-aKHlaq ki rah

main ne phulon ko kiya rang-e-wafa se aagah

ab to is bagh pe hai sab ki mohabbat ki nigah

jo ki paude the shajar ho gae masha-allah

kya kahun rang-e-jawani mein jo is rag ke the

baghban ho gae gulchin jo mere bagh ke the

go ki baqi nahin kaifiyyat-e-tufan-e-shabab

phans ke janjal mein duniya ke ye qissa hua KHwab

mast rahta hai magar ab bhi dil-e-KHana-KHarab

sham ko baiTh ke mahfil mein lunDhata hun sharab

nashsha-e-ilm ki ummid pe jine wale

simaT aate hain sar-e-sham se pine wale

aur hi rang pe hai aaj bahaar-e-gulshan

sair ke waste aae hain azizan-e-watan

farsh aankhen kiye baiThe hain jawanan-e-chaman

dil mein tufan-e-tarab lab pe mohabbat ke suKHan

kaun hai aaj jo is bazm mein masrur nahin

ruh-e-sarshaar bhi khinch aae to kuchh dur nahin

magar afsos ye duniya hai maqam-e-ibrat

ranj ki yaad dilata hai KHayal-e-rahat

aaj yaad aati hai un phulon ki mujh ko surat

khilte hi kar gae jo mere chaman se rehlat

chashm-e-bad-dur gulon ki ye bhari Dali hai

chand phulon ki magar is mein jagah KHali hai

ye wo gul the jinhen arbab-e-nazar ne roya

bhai ne bahnon ne madar ne pidar ne roya

KHak rona tha jo is dida-e-tar ne roya

muddaton in ko mere qalb-o-jigar ne roya

dil ke kuchh dagh-e-mohabbat hain nishani un ki

bachpana dekh ke dekhi na jawani un ki

KHair duniya mein kabhi soz hai aur kabhi hai saz

naunihaalan-e-chaman ki rahe ab umr daraaz

bhai se baDh ke mujhe hain ye mere maya-naz

mere monis hain yahi aur yahi mere hamraaz

mar ke bhi ruh meri dil ki tarah shad rahe

main rahun ya na rahun ye chaman aabaad rahe