dard-e-zeh

vo thā ik lamha-e-taḳhlīq

jis ne aag raushan kī

taḌaptī thī safūra dard-e-zeh se

aur muusā ko

sar-e-vādī-e-sīnā nuur kā lapkā nazar aayā

ḳhudā-e-azz-o-jal se

ham-kalāmī kī sa.ādat ho ga.ī hāsil

milā ohda payambar kā

magar vo kokh meñ jis ne

mahīnoñ thaam kar rakkhā

mohabbat kā munazzah lamha

jis ne ġhuncha-e-nauras ko chaTkayā

sar-e-shāḳh-e-rifāqat

jis ne lorī ke bune haiñ bol

valī hai vo

nabī hai

aur na paiġhambar

wo tha ek lamha-e-taKHliq

jis ne aag raushan ki

taDapti thi safura dard-e-zeh se

aur musa ko

sar-e-wadi-e-sina nur ka lapka nazar aaya

KHuda-e-azz-o-jal se

ham-kalami ki saadat ho gai hasil

mila ohda payambar ka

magar wo kokh mein jis ne

mahinon tham kar rakkha

mohabbat ka munazzah lamha

jis ne ghuncha-e-nauras ko chaTkaya

sar-e-shaKH-e-rifaqat

jis ne lori ke bune hain bol

wali hai wo

nabi hai

aur na paighambar