dard hota hai

bahr-kaif jo dard hotā hai

vo dard hotā hai

eḌī meñ kāñTā chubhe

to badan tilmilātā hai

dil zabt kartā hai rotā hai

jo barg Tahnī se girtā hai

vo zard hotā hai

chakkī ke pāToñ meñ daane to piste haiñ

paanī se nikle to machhlī taḌaptī hai

taa.ir qafas meñ

giraftār hoñ to phaḌakte haiñ

bādal se bādal mileñ to kaḌakte haiñ

bijlī chamaktī hai

barsāt hotī hai

jo hijr kī raat hotī hai

vo hijr kī raat hotī hai

ham apnī vahshat meñ

jo bhes badleñ

koī ruup dhāreñ

samundar baloeñ yā dīvār chāTeñ

tasavvur kī jhilmil meñ

din raat kāTeñ

pahāḌoñ pe chhuTTī manāne ko jaa.eñ

nadī meñ nahā.eñ

ġhizāoñ kī lazzat meñ sarshār hoñ

roz poshāk par ek poshāk badleñ

kisī itr kī phuvār chhiḌkeñ

charāġhoñ kī rañgīn lau meñ

bhare ras bhare hoñT chhū leñ

sanobar ke bāġhoñ meñ ghūmeñ

magar bojh dil kā jo hotā hai

vo to ba-dastūr hotā hai

andar hī andar kahīñ

saat pardoñ meñ mastūr hotā hai!

maiñ aaj kī sub.h

ma.amūl se qabl jaagā huuñ

ḳhvābīda beToñ ke gāloñ pe

bosa diyā hai

vazū kar ke sajda kiyā hai

bahut der tak

āltī-pāltī maar kar

ḳhud meñ gum ho ke

yogā ke aasan meñ baiThā huuñ

sūkhe hue saare gamloñ ko

paanī diyā hai

chhatoñ khiḌkiyoñ aur zīnoñ meñ

makḌī ke jāloñ ko poñchā hai

chiḌiyoñ ko

roTī ke reze bhī Daale haiñ

lekin jo chhāle mire dil ke haiñ

vo bahr-kaif chhāle haiñ

chhāloñ kī sozish se

taklīf hotī hai

dil zabt kartā hai rotā hai

jo dard hotā hai

vo dard hotā hai!!

bahr-kaif jo dard hota hai

wo dard hota hai

eDi mein kanTa chubhe

to badan tilmilata hai

dil zabt karta hai rota hai

jo barg Tahni se girta hai

wo zard hota hai

chakki ke paTon mein dane to piste hain

pani se nikle to machhli taDapti hai

tair qafas mein

giraftar hon to phaDakte hain

baadal se baadal milen to kaDakte hain

bijli chamakti hai

barsat hoti hai

jo hijr ki raat hoti hai

wo hijr ki raat hoti hai

hum apni wahshat mein

jo bhes badlen

koi rup dhaaren

samundar baloen ya diwar chaTen

tasawwur ki jhilmil mein

din raat kaTen

pahaDon pe chhuTTi manane ko jaen

nadi mein nahaen

ghizaon ki lazzat mein sarshaar hon

roz poshak par ek poshak badlen

kisi itr ki phuwar chhiDken

charaghon ki rangin lau mein

bhare ras bhare honT chhu len

sanobar ke baghon mein ghumen

magar bojh dil ka jo hota hai

wo to ba-dastur hota hai

andar hi andar kahin

sat pardon mein mastur hota hai!

main aaj ki subh

mamul se qabl jaga hun

KHwabida beTon ke galon pe

bosa diya hai

wazu kar ke sajda kiya hai

bahut der tak

aalti-palti mar kar

KHud mein gum ho ke

yoga ke aasan mein baiTha hun

sukhe hue sare gamlon ko

pani diya hai

chhaton khiDkiyon aur zinon mein

makDi ke jalon ko poncha hai

chiDiyon ko

roTi ke reze bhi Dale hain

lekin jo chhaale mere dil ke hain

wo bahr-kaif chhaale hain

chhaalon ki sozish se

taklif hoti hai

dil zabt karta hai rota hai

jo dard hota hai

wo dard hota hai!!