dardmandi

dekhte dekhte

chyūñTiyāñ kitnī roñdī ga.iiñ

āḳhirī saañs tak

palaT kar jhapaTne kī ummīd meñ

sar uThātī rahīñ

dekhte dekhte

mere a.asāb meñ

bijliyāñ ghul ga.iiñ

reñgtī chyūñTiyāñ

jild ko chiir kar

ḳhuun meñ mil ga.iiñ

ab maiñ koī aur huuñ

ek ghāyal darinda ki jis ke liye

zaḳhm hī zaḳhm haiñ

(chāhe apne hoñ yā dūsroñ ke)

āḳhirī saañs tak

zaḳhm hī zaḳhm haiñ

saarī bastī hai sahmī huī

log sab falsafe

bāñdh kar bhaag uThe

mujh pe ab koī hañstā nahīñ

maiñ akelā magar

kal baḌī der tak ḳhud pe hañstā rahā

ā.īne se ye kahtā rahā

''yā to har dard ke koī ma.anī haiñ

yā phir kisī dard ke koī ma.anī nahīñ''

dekhte dekhte

chyunTiyan kitni rondi gain

aaKHiri sans tak

palaT kar jhapaTne ki ummid mein

sar uThati rahin

dekhte dekhte

mere aasab mein

bijliyan ghul gain

rengti chyunTiyan

jild ko chir kar

KHun mein mil gain

ab main koi aur hun

ek ghayal darinda ki jis ke liye

zaKHm hi zaKHm hain

(chahe apne hon ya dusron ke)

aaKHiri sans tak

zaKHm hi zaKHm hain

sari basti hai sahmi hui

log sab falsafe

bandh kar bhag uThe

mujh pe ab koi hansta nahin

main akela magar

kal baDi der tak KHud pe hansta raha

aaine se ye kahta raha

ya to har dard ke koi mani hain

ya phir kisi dard ke koi mani nahin