daricha khula hai

sunahrā parinda

nayā ek sūraj

paroñ meñ chhupā.e

darīche meñ yuuñ

chahchahāne lagā hai

ki har roz āñkheñ

vahī naqsh phir DhūñDhtī haiñ

sunahrā parinda

hai shīshe ke andar

ki shīshe ke bāhar

koī bhī nahīñ jāntā hai

vo akkās aisā hai

manzar ghulāe milā.e

agar us kī tasvīr khīñchī ga.ī to

na jaane vo kyā kuchh dikhā.e

sunahrā parinda

jo chāroñ anāsir kī yakjā.ī se

ik anokhā sā mānūs manzar banā.e

zamānoñ ke qisse sune aur sunā.e

ki jab maiñ ne sūraj ko dekhā nahīñ thā

vahīñ thā vahīñ thā

vo zar-baft kirnoñ kā paalā

darīche meñ hai sā.atoñ kā ujālā

kabhī shaam kī āḳhirī raushnī hai

kabhī sub.h-e-raushan kā hai vo sapīda

sunahrā parinda

na aabī na ḳhākī

na hī dāstānī

magar āsmānī bhī to vo nahīñ hai

samundar ke atrāf ke saare mausam

paroñ meñ sameTe hue hai

vo pūrab ko pachchhim ko

uttar ko dakhkhin ko

apne paroñ se lapeTe hue hai

sunahrā parinda

jo dīvār par murtasim

saare gītoñ ko

nazmoñ ko pahchāntā hai

nahīñ jāntā hai

ki ye nazm

kis ne likhī hai

sunahra parinda

naya ek suraj

paron mein chhupae

dariche mein yun

chahchahane laga hai

ki har roz aankhen

wahi naqsh phir DhunDhti hain

sunahra parinda

hai shishe ke andar

ki shishe ke bahar

koi bhi nahin jaanta hai

wo akkas aisa hai

manzar ghulae milae

agar us ki taswir khinchi gai to

na jaane wo kya kuchh dikhae

sunahra parinda

jo chaaron anasir ki yakjai se

ek anokha sa manus manzar banae

zamanon ke qisse sune aur sunae

ki jab main ne suraj ko dekha nahin tha

wahin tha wahin tha

wo zar-baft kirnon ka pala

dariche mein hai saaton ka ujala

kabhi sham ki aaKHiri raushni hai

kabhi subh-e-raushan ka hai wo sapida

sunahra parinda

na aabi na KHaki

na hi dastani

magar aasmani bhi to wo nahin hai

samundar ke atraf ke sare mausam

paron mein sameTe hue hai

wo purab ko pachchhim ko

uttar ko dakhkhin ko

apne paron se lapeTe hue hai

sunahra parinda

jo diwar par murtasim

sare giton ko

nazmon ko pahchanta hai

nahin jaanta hai

ki ye nazm

kis ne likhi hai