daur-e-uftadgi

naġhmagī giit harf-o-navā

nāla-e-shauq saut-o-sadā

ek bahrī siyāsat ke darbār meñ

sar-nigūñ pā-ba-zanjīr laa.e ga.e

saarā sīmāb naqd-o-nazar

sab tilismāt-e-harf-o-hunar

pardā-e-sehr-o-asrār se TuuT kar

maqtal-e-ārzū ban ga.e

vo tarab-zār dil-e-qasr-e-ġham

rāt-bhar jāgtī āgahī ya.anī

aqlīm-jāñ

mashīnoñ ke khañDarāt meñ kho ga.e

vo jo āhañg-e-ālam thā

ḳhvāboñ kā maskan thā aur harf-o-ma.anī kī tathīr thā

apnī bedāriyoñ kī sazā kāTne ke liye

sañg-o-āhan meñ Dhālā gayā

sajda-e-haq

tamannā ke āfāq tak dard ke qāfile

kāba-e-nūr tak ābla-pā.ī ke silsile

zar-e-maġhrib kī mīzān meñ tul ga.e

ham ki is dasht meñ ābla-pā the sadiyoñ se

is raah ke sañg-e-mīl

apne qadmoñ ke hamrāz the

ham bhī is daur-e-uftādgī meñ

bas

tamāshā-e-ahl-e-karam dekhte rah ga.e

naghmagi git harf-o-nawa

nala-e-shauq saut-o-sada

ek bahri siyasat ke darbar mein

sar-nigun pa-ba-zanjir lae gae

sara simab naqd-o-nazar

sab tilismat-e-harf-o-hunar

parda-e-sehr-o-asrar se TuT kar

maqtal-e-arzu ban gae

wo tarab-zar dil-e-qasr-e-gham

raat-bhar jagti aagahi yani

aqlim-jaan

mashinon ke khanDaraat mein kho gae

wo jo aahang-e-alam tha

KHwabon ka maskan tha aur harf-o-mani ki tathir tha

apni bedariyon ki saza kaTne ke liye

sang-o-ahan mein Dhaala gaya

sajda-e-haq

tamanna ke aafaq tak dard ke qafile

kaba-e-nur tak aabla-pai ke silsile

zar-e-maghrib ki mizan mein tul gae

hum ki is dasht mein aabla-pa the sadiyon se

is rah ke sang-e-mil

apne qadmon ke hamraaz the

hum bhi is daur-e-uftadgi mein

bas

tamasha-e-ahl-e-karam dekhte rah gae