dekhte dekhte

chyūñTiyāñ kitnī roñdī ga.iiñ

āḳhirī saañs tak

palaT kar jhapaTne kī ummīd meñ

sar uThātī rahīñ

kitnā be-mudda.ā hausla

dekhte dekhte miT gayā

reñgtī chyūñTiyāñ

jild ko chiir kar

ḳhuun meñ mil ga.iiñ

mere a.asāb meñ

bijliyāñ ghul ga.iiñ

ab maiñ koī aur huuñ

ek ghāyal darinda

zaḳhm hī zaḳhm haiñ

chāhe apne huuñ yā dūsroñ ke

zaḳhm hī zaḳhm haiñ

mujh pe ab koī hañstā nahīñ

saarī bastī hai sahmī huī

log sab falsafe

bāñdh kar bhaag uThe

maiñ akelā baḌī der tak

ḳhud pe hañstā rahā

aa.ine se ye kahtā rahā

yā to har dard ke koī ma.anī haiñ

yā phir kisī dard ke koī ma.anī nahīñ

chyunTiyan kitni rondi gain

aaKHiri sans tak

palaT kar jhapaTne ki ummid mein

sar uThati rahin

kitna be-muddaa hausla

dekhte dekhte miT gaya

rengti chyunTiyan

jild ko chir kar

KHun mein mil gain

mere aasab mein

bijliyan ghul gain

ab main koi aur hun

ek ghayal darinda

zaKHm hi zaKHm hain

chahe apne hun ya dusron ke

zaKHm hi zaKHm hain

mujh pe ab koi hansta nahin

sari basti hai sahmi hui

log sab falsafe

bandh kar bhag uThe

main akela baDi der tak

KHud pe hansta raha

aaine se ye kahta raha

ya to har dard ke koi mani hain

ya phir kisi dard ke koi mani nahin