jamhuriyat zindabaad

apne bhārat meñ jo ujālā hai

use jamhūriyat ne Dhālā hai

ye haqīqat hai saarī duniyā se

apnā dastūr bhī nirālā hai

sab ko yaksāñ huqūq jis ne diye

is meñ maujūd sab havāla hai

kyā hī chhabbīs january kā ye din

azmat-o-ehtishām vaalā hai

ham sabhī ehtirām karte haiñ

aaj kā din buland-o-bālā hai

hotā jaatā hai mulk phir bhī buland

laakh duniyā ne bech Daalā hai

jin ke ghar the kabhī añdheroñ meñ

ab vahāñ bhī baḌā ujālā hai

ye hai jamhūriyat kā hī sadqa

jis ne sūraj nayā nikālā hai

mas.ale vo bhī jald hal hoñge

aaj jin mas.aloñ se paalā hai

haiñ yahāñ bā-kamāl log bahut

desh kā jin se bol baalā hai

tujh ko jamhūriyat salām mirā

tū mohabbat kā ik shivāla hai

apne hindostāñ ko dekho ‘mohī’

jis kī āġhosh meñ himāla hai

apne bhaarat mein jo ujala hai

use jamhuriyat ne Dhaala hai

ye haqiqat hai sari duniya se

apna dastur bhi nirala hai

sab ko yaksan huquq jis ne diye

is mein maujud sab hawala hai

kya hi chhabbis january ka ye din

azmat-o-ehtisham wala hai

hum sabhi ehtiram karte hain

aaj ka din buland-o-baala hai

hota jata hai mulk phir bhi buland

lakh duniya ne bech Dala hai

jin ke ghar the kabhi andheron mein

ab wahan bhi baDa ujala hai

ye hai jamhuriyat ka hi sadqa

jis ne suraj naya nikala hai

masale wo bhi jald hal honge

aaj jin masalon se pala hai

hain yahan ba-kamal log bahut

desh ka jin se bol baala hai

tujh ko jamhuriyat salam mera

tu mohabbat ka ek shiwala hai

apne hindostan ko dekho ‘mohi’

jis ki aaghosh mein himala hai