devdas

zindagī ishq kī vahshat-bharā afsāna thī

mere hāthoñ meñ vo ik zahr kā paimāna thī

ruuh kā ġham ma-e-gulfām se kam kyā hotā

koī tiryāk ba-juz vasl-e-sanam kyā hotā

kho ga.ī 'pārbatī' rotī rahī 'chandrmukhī'

zindagī luTtī rahī rāh-guzāroñ meñ mirī

ġhamgusāroñ kī bhī yaad aa.ī magar bhuul gayā

us kī bāñhoñ ke sivā kuchh na mujhe yaad rahā

ik ubhartī rahī tasvīr ḳhalā meñ barsoñ

maiñ akelā hī phirā dasht-e-vafā meñ barsoñ

jal bujhā jism ke hamrāh dil-e-sozāñ tak

jaan dene chalā aayā huuñ dar-e-jānāñ tak

mar rahūñ jaise be-bas-o-lāchār mare

kyā qayāmat hai ki yuuñ ishq kā bīmār mare

nā-umīdī hai ki ab tāqat-e-dīdār ga.ī

ruḳh-e-jānāñ kī havas rūh-e-giraftār ga.ī

raat lo ḳhatm huī aur zabāñ band huī

mujh ko ma.alūm thā ḳhāmosh saverā hogā

log pheñk ā.eñge mujh ko jahāñ us marghaT par

maut kā chhāyā huā ghor añdherā hogā

chiil kavvoñ ne magar laash ke TukḌe kar ke

har taraf kūcha-e-jānāñ meñ bikherā hogā

zindagi ishq ki wahshat-bhara afsana thi

mere hathon mein wo ek zahr ka paimana thi

ruh ka gham ma-e-gulfam se kam kya hota

koi tiryak ba-juz wasl-e-sanam kya hota

kho gai 'parbati' roti rahi 'chandrmukhi'

zindagi luTti rahi rah-guzaron mein meri

ghamgusaron ki bhi yaad aai magar bhul gaya

us ki banhon ke siwa kuchh na mujhe yaad raha

ek ubharti rahi taswir KHala mein barson

main akela hi phira dasht-e-wafa mein barson

jal bujha jism ke hamrah dil-e-sozan tak

jaan dene chala aaya hun dar-e-jaanan tak

mar rahun jaise be-bas-o-lachaar mare

kya qayamat hai ki yun ishq ka bimar mare

na-umidi hai ki ab taqat-e-didar gai

ruKH-e-jaanan ki hawas ruh-e-giraftar gai

raat lo KHatm hui aur zaban band hui

mujh ko malum tha KHamosh sawera hoga

log phenk aaenge mujh ko jahan us marghaT par

maut ka chhaya hua ghor andhera hoga

chil kawwon ne magar lash ke TukDe kar ke

har taraf kucha-e-jaanan mein bikhera hoga