dhaDkanen

(1)

mausam-e-sarmā kī ThiThurātī huī shām-e-hazīñ

choTiyoñ par barf kī ik laash

saare peḌ nange TunD-munD

sahn meñ vo charmarāte bhūre pattoñ kā kafan

ek sannāTā

vo ik Tahnī taḌaḳh kar gir paḌī

ik saañs TuuTā

(2)

maiñ ne kal hī apne būḌhe baap ke ThanDe badan ko

ġhusl de ke apne hāthoñ

kaalī dhartī ke dahāne meñ utārā

ki yahī hai rasm

maiñ zinda bhī pāmāl-e-rusūm

zindagī meñ vo chaTaktī raushnī kā ek mīnār-e-buland

us kī kirnoñ ne hazāroñ qumqume raushan kiye

aur ye rasm-e-zamāna

umr-bhar jo dūsroñ ko raushnī detā rahā

ik añdherī qabr is ke vāste

(3)

aane vaale mausamoñ meñ saiñkaḌoñ hī Tahniyāñ phūTeñgī

lekin jis jagah us peḌ se ye shāḳh TuuTī

vo nishāñ ik dā.era ban kar rahegā

maiñ ne jin hāthoñ se apne baap ke ThanDe badan ko

kaalī dhartī ke dahāne meñ utārā

us kī poroñ se vo būḌhī dhaḌkaneñ qirtās par bahtī raheñgī

(1)

mausam-e-sarma ki ThiThuraati hui sham-e-hazin

choTiyon par barf ki ek lash

sare peD nange TunD-munD

sahn mein wo charmaraate bhure patton ka kafan

ek sannaTa

wo ek Tahni taDaKH kar gir paDi

ek sans TuTa

(2)

main ne kal hi apne buDhe bap ke ThanDe badan ko

ghusl de ke apne hathon

kali dharti ke dahane mein utara

ki yahi hai rasm

main zinda bhi pamal-e-rusum

zindagi mein wo chaTakti raushni ka ek minar-e-buland

us ki kirnon ne hazaron qumqume raushan kiye

aur ye rasm-e-zamana

umr-bhar jo dusron ko raushni deta raha

ek andheri qabr is ke waste

(3)

aane wale mausamon mein sainkaDon hi Tahniyan phuTengi

lekin jis jagah us peD se ye shaKH TuTi

wo nishan ek daera ban kar rahega

main ne jin hathon se apne bap ke ThanDe badan ko

kali dharti ke dahane mein utara

us ki poron se wo buDhi dhaDkanen qirtas par bahti rahengi