dhund ke par

dhund ke pare ik din

raushnī ke haale meñ

vo mujhe nazar aayā

jaise devtā koī

muntazir ho daasī kā

maiñ ne rū-ba-rū ho kar

us se iltijā kī thī

doge raushnī apnī musta.ār lenī hai

har taraf añdherā hai

mezbānī karnī hai

kuchh ḳharāb hāloñ kī

ruuh kī kasāfat kā

dil pe bojh hai jin ke

chand zaḳhm aise haiñ

jo ki bhar na pā.eñge

gar nahīñ mile un ko

raushnī ke ye haale

merī baat sun kar vo

muskurā ke bolā thā

be-niyāz shahzādī

jaan kyuuñ nahīñ letīñ

raushnī kā rauzan to

sirf tum se khultā hai

dhundlātā har manzar

is liye to vāzeh hai

jhilmilātī ye kirneñ

tum se hī to phūTī haiñ

ḳhud ko joḌ lo ḳhud se

raushnī to tum se hai

dhund ke pare ek din

raushni ke haale mein

wo mujhe nazar aaya

jaise dewta koi

muntazir ho dasi ka

main ne ru-ba-ru ho kar

us se iltija ki thi

doge raushni apni mustaar leni hai

har taraf andhera hai

mezbani karni hai

kuchh KHarab haalon ki

ruh ki kasafat ka

dil pe bojh hai jin ke

chand zaKHm aise hain

jo ki bhar na paenge

gar nahin mile un ko

raushni ke ye haale

meri baat sun kar wo

muskura ke bola tha

be-niyaz shahzadi

jaan kyun nahin letin

raushni ka rauzan to

sirf tum se khulta hai

dhundlata har manzar

is liye to wazeh hai

jhilmilati ye kirnen

tum se hi to phuTi hain

KHud ko joD lo KHud se

raushni to tum se hai