dipawli

mirī sāñsoñ ko giit aur aatmā ko saaz detī hai

ye dīvālī hai sab ko jiine kā andāz detī hai

hirdai ke dvaar par rah rah ke detā hai koī dastak

barābar zindagī āvāz par āvāz detī hai

simaTtā hai añdherā paañv phailātī hai dīvālī

hañsā.e jaatī hai rajnī hañse jaatī hai dīvālī

qatāreñ dekhtā huuñ chalte-phirte māh-pāroñ kī

ghaTā.eñ āñchaloñ kī aur barkhā hai sitāroñ kī

vo kaale kaale gesū surḳh hoñT aur phuul se aariz

nagar meñ har taraf pariyāñ Tahaltī haiñ bahāroñ kī

nigāhoñ kā muqaddar aa ke chamkātī hai dīvālī

pahan kar dīp-mālā naaz farmātī hai dīvālī

ujāle kā zamāna hai ujāle kī javānī hai

ye hañstī jagmagātī raat sab rātoñ kī raanī hai

vahī duniyā hai lekin husn dekho aaj duniyā kā

hai jab tak raat baaqī kah nahīñ sakte ki faanī hai

vo jīvan aaj kī raat aa ke barsātī hai dīvālī

pasīna maut ke māthe pe chhalkātī hai dīvālī

sabhī ke diip sundar haiñ hamāre kyā tumhāre kyā

ujālā har taraf hai is kināre us kināre kyā

gagan kī jagmagāhaT paḌ ga.ī hai aaj maddham kyuuñ

muñDeroñ aur chhajjoñ par utar aa.e haiñ taare kyā

hazāroñ saal guzre phir bhī jab aatī hai dīvālī

mahal ho chāhe kuTiyā sab pe chhā jaatī hai dīvālī

isī din darupadī ne krishn ko bhaa.ī banāyā thā

vachan ke dene vaale ne vachan apnā nibhāyā thā

janam din laxmī kā hai bhalā is din kā kyā kahnā

yahī vo din hai jis ne raam ko raaja banāyā thā

ka.ī itihās ko ek saath dohrātī hai dīvālī

mohabbat par vijay ke phuul barsātī hai dīvālī

gale meñ haar phūloñ kā charan meñ dīp-mālā.eñ

mukuT sar par hai mukh par zindagī kī rūp-rekhā.eñ

liye haiñ kar meñ mañgal-ghaT na kyuuñ ghaT ghaT pe chhā jaa.eñ

agar partav paḌe murda-diloñ par vo bhī jī jaa.eñ

ajab andāz se rah rah ke muskātī hai dīvālī

mohabbat kī lahar nas nas meñ dauḌātī hai dīvālī

tumhārā huuñ tum apnī baat mujh se kyuuñ chhupāte ho

mujhe ma.alūm hai jis ke liye chakkar lagāte ho

banaras ke ho tum ko chāhiye tyauhār ghar karnā

butoñ ko chhoḌ kar tum kyuuñ allahabad jaate ho

na jaao aise meñ bāhar 'nazīr' aatī hai dīvālī

ye kāshī hai yahīñ to rañg dikhlātī hai dīvālī

meri sanson ko git aur aatma ko saz deti hai

ye diwali hai sab ko jine ka andaz deti hai

hirdai ke dwar par rah rah ke deta hai koi dastak

barabar zindagi aawaz par aawaz deti hai

simaTta hai andhera panw phailati hai diwali

hansae jati hai rajni hanse jati hai diwali

qataren dekhta hun chalte-phirte mah-paron ki

ghaTaen aanchalon ki aur barkha hai sitaron ki

wo kale kale gesu surKH honT aur phul se aariz

nagar mein har taraf pariyan Tahalti hain bahaaron ki

nigahon ka muqaddar aa ke chamkati hai diwali

pahan kar dip-mala naz farmati hai diwali

ujale ka zamana hai ujale ki jawani hai

ye hansti jagmagati raat sab raaton ki rani hai

wahi duniya hai lekin husn dekho aaj duniya ka

hai jab tak raat baqi kah nahin sakte ki fani hai

wo jiwan aaj ki raat aa ke barsati hai diwali

pasina maut ke mathe pe chhalkati hai diwali

sabhi ke dip sundar hain hamare kya tumhaare kya

ujala har taraf hai is kinare us kinare kya

gagan ki jagmagahaT paD gai hai aaj maddham kyun

munDeron aur chhajjon par utar aae hain tare kya

hazaron sal guzre phir bhi jab aati hai diwali

mahal ho chahe kuTiya sab pe chha jati hai diwali

isi din darupadi ne krishn ko bhai banaya tha

wachan ke dene wale ne wachan apna nibhaya tha

janam din laxmi ka hai bhala is din ka kya kahna

yahi wo din hai jis ne ram ko raja banaya tha

kai itihas ko ek sath dohraati hai diwali

mohabbat par wijay ke phul barsati hai diwali

gale mein haar phulon ka charan mein dip-malaen

mukuT sar par hai mukh par zindagi ki rup-rekhaen

liye hain kar mein mangal-ghaT na kyun ghaT ghaT pe chha jaen

agar partaw paDe murda-dilon par wo bhi ji jaen

ajab andaz se rah rah ke muskati hai diwali

mohabbat ki lahar nas nas mein dauDati hai diwali

tumhaara hun tum apni baat mujh se kyun chhupate ho

mujhe malum hai jis ke liye chakkar lagate ho

banaras ke ho tum ko chahiye tyauhaar ghar karna

buton ko chhoD kar tum kyun allahabad jate ho

na jao aise mein bahar 'nazir' aati hai diwali

ye kashi hai yahin to rang dikhlati hai diwali