diwali aai

chaar jānib hai yahī shor divālī aa.ī

sāl-e-māzī kī tarah laa.ī hai ḳhushiyāñ imsāl

yuuñ to har shaḳhs masarrat se khilā jaatā hai

phir bhī bachche hue jaate haiñ ḳhushī se behāl

har bashar mahv hai is jashn kī tayyārī meñ

taaki ḳhushiyoñ kā qamar aur ziyā-baḳhsh hai

kar rahe haiñ sabhī mil-jul ke safā.ī ghar kī

un kī koshish hai ki tābinda har ek naqsh bane

utar aa.e haiñ zamīñ par bhī falak se taare

dāman-e-charḳh meñ ai dosto kyā rakkhā hai

rashk-aflāk nazar aatī hai har ik bastī

aaj dhartī ko bhī ākāsh banā rakkhā hai

sāf-shaffāf chamakte hue pur-nūr makāñ

sehn-e-gulshan meñ khile jaise hoñ rañgīn gulāb

jhiil meñ tairte hoñ nuur se ma.amūr kañval

yā utar aa.e hoñ gardūñ se hazāroñ mahtāb

mujh ko bhātī nahīñ vallāh maiñ sach kahtā huuñ

zāhirī aur dikhāve kī sajāvaT yaaro

jab ki āzād haiñ sab mulk bhī apnā āzād

mujh ko achchhī nahīñ lagtī hai banāvaT ab to

ham ne ajdād kī ādāt bhulā rakkhī haiñ

un kī nazroñ meñ to har qaum barābar thī kañval

vo samajhte the har ik qaum ko apnā bhaa.ī

un kī is baat ke shāhid haiñ abhī dasht-o-jabal

dasht meñ raam ne shabrī kī ziyāfat khaa.ī

bhīlnī ke yahāñ khāne meñ bhī inkār na thā

kyā batā.eñge ye arbāb-e-ḳhirad ab mujh ko

ġhair sugrīv shrī-rām kā kyā yaar na thā

raam kī fauj meñ har qaum ke afrād na the

kyā hanūmān na the fauj kī un kī sālār

maiñ karūñ us kī shikāyat to nahīñ hai bejā

kyā tumheñ aaj haqīqat meñ hai ajdād se pyaar

kyā tumheñ chhūt kā ye dars buzurgoñ ne diyā

kyā tumheñ firqa-parastī kī ijāzat dī thī

raam ke mānñe vaalo kabhī itnā sochā

kyā buzurgoñ ne kisī qaum se nafrat kī thī

merā kahnā hai yahī hind ke bāshindoñ se

qalb kī apne safā.ī karo pahle yaaro

dil meñ nafrat kī siyāhī kī jo āmezish hai

āb-e-ulfat se dhulā.ī karo pahle yaaro

ab to ulfat ke charāġhoñ ko jalā kar pahle

ghar meñ har ik ke na.ī jot jagānā hai tumheñ

nūr-e-ulfat se sajānā hai na.e bhārat ko

mil ke tyauhār divālī kā manānā hai tumheñ

mujh ko ḳhvāhish hai usī shaan kī dīvālī kī

laxmī desh meñ ulfat kī shab-o-roz rahe

desh ko pyaar se mehnat se sañvāreñ mil kar

ahl-e-bhārat ke diloñ meñ ye 'kañval' soz rahe

chaar jaanib hai yahi shor diwali aai

sal-e-mazi ki tarah lai hai KHushiyan imsal

yun to har shaKHs masarrat se khila jata hai

phir bhi bachche hue jate hain KHushi se behaal

har bashar mahw hai is jashn ki tayyari mein

taki KHushiyon ka qamar aur ziya-baKHsh hai

kar rahe hain sabhi mil-jul ke safai ghar ki

un ki koshish hai ki tabinda har ek naqsh bane

utar aae hain zamin par bhi falak se tare

daman-e-charKH mein ai dosto kya rakkha hai

rashk-aflak nazar aati hai har ek basti

aaj dharti ko bhi aakash bana rakkha hai

saf-shaffaf chamakte hue pur-nur makan

sehn-e-gulshan mein khile jaise hon rangin gulab

jhil mein tairte hon nur se mamur kanwal

ya utar aae hon gardun se hazaron mahtab

mujh ko bhati nahin wallah main sach kahta hun

zahiri aur dikhawe ki sajawaT yaro

jab ki aazad hain sab mulk bhi apna aazad

mujh ko achchhi nahin lagti hai banawaT ab to

hum ne ajdad ki aadat bhula rakkhi hain

un ki nazron mein to har qaum barabar thi kanwal

wo samajhte the har ek qaum ko apna bhai

un ki is baat ke shahid hain abhi dasht-o-jabal

dasht mein ram ne shabri ki ziyafat khai

bhilni ke yahan khane mein bhi inkar na tha

kya bataenge ye arbab-e-KHirad ab mujh ko

ghair sugriw shri-ram ka kya yar na tha

ram ki fauj mein har qaum ke afrad na the

kya hanuman na the fauj ki un ki salar

main karun us ki shikayat to nahin hai beja

kya tumhein aaj haqiqat mein hai ajdad se pyar

kya tumhein chhut ka ye dars buzurgon ne diya

kya tumhein firqa-parasti ki ijazat di thi

ram ke manne walo kabhi itna socha

kya buzurgon ne kisi qaum se nafrat ki thi

mera kahna hai yahi hind ke bashindon se

qalb ki apne safai karo pahle yaro

dil mein nafrat ki siyahi ki jo aamezish hai

aab-e-ulfat se dhulai karo pahle yaro

ab to ulfat ke charaghon ko jala kar pahle

ghar mein har ek ke nai jot jagana hai tumhein

nur-e-ulfat se sajaana hai nae bhaarat ko

mil ke tyauhaar diwali ka manana hai tumhein

mujh ko KHwahish hai usi shan ki diwali ki

laxmi desh mein ulfat ki shab-o-roz rahe

desh ko pyar se mehnat se sanwaren mil kar

ahl-e-bhaarat ke dilon mein ye 'kanwal' soz rahe