diwar-e-girya

ek dīvār jo haa.el hai mirī sochoñ meñ

kitne pechīda savāloñ se mujhe roktī hai

jab bhī maiñ raḳht-e-safar bāñdhtī huuñ shāne par

apnī jādū-bharī hastī se mujhe Toktī hai

ye jo dīvār ki rahtī hai siyah ḳhānoñ meñ

din Dhale apne tilismāt ko dikhlātī hai

mujh ko mahsūr kiye rakhtī hai añgāroñ meñ

chaar jānib ruḳh-r-anvār se bahlātī hai

aisā lagtā hai ki tāroñ se damaktī huī raat

ik zarā jumbish-e-mizhgāñ se bhī bujh jā.egī

merī sochoñ ke tasalsul ko ye biphrī nāgin

ek hī aan meñ afsos nigal jā.egī

sub.h hote hī ye dīvār-e-siyah ḳhānoñ meñ

ret ke Dher kī mānind utar jā.egī

raat kī jādūgarī ḳhvāb sī ban jā.egī

sham.a-dānoñ meñ faqat raakh hī rah jā.egī

ik nayā din mirī vīrān guzargāhoñ par

le ke kashkol mire saath utar aa.egā

mere dāman se lipaT kar ye samay kā relā

mujh ko mujh se hī judā karne pe uksā.egā

''ek dīvār jo haa.el hai marī sochoñ meñ''

ek diwar jo hael hai meri sochon mein

kitne pechida sawalon se mujhe rokti hai

jab bhi main raKHt-e-safar bandhti hun shane par

apni jadu-bhari hasti se mujhe Tokti hai

ye jo diwar ki rahti hai siyah KHanon mein

din Dhale apne tilismat ko dikhlati hai

mujh ko mahsur kiye rakhti hai angaron mein

chaar jaanib ruKH-r-anwar se bahlati hai

aisa lagta hai ki taron se damakti hui raat

ek zara jumbish-e-mizhgan se bhi bujh jaegi

meri sochon ke tasalsul ko ye biphri nagin

ek hi aan mein afsos nigal jaegi

subh hote hi ye diwar-e-siyah KHanon mein

ret ke Dher ki manind utar jaegi

raat ki jadugari KHwab si ban jaegi

shama-danon mein faqat rakh hi rah jaegi

ek naya din meri viran guzargahon par

le ke kashkol mere sath utar aaega

mere daman se lipaT kar ye samay ka rela

mujh ko mujh se hi juda karne pe uksaega

ek diwar jo hael hai mari sochon mein