diwar

maiñ ik devtā-e-anā

nargisiyyat kā maarā huā

aur azal se takabbur meñ Duubā huā

kaafī ḳhud-sar huuñ

ziddī huuñ maġhrūr huuñ

mere chāroñ taraf merī andhī anā kī vo dīvār hai

jis meñ aane kī aur mujh se milne kī ghulne kī koī ijāzat kisī ko nahīñ hai

tumheñ bhī nahīñ hai

use bhī nahīñ hai

mujhe bhī nahīñ hai

maiñ apnī anā kī dīvāroñ meñ tum se alag ho rahūñ

mujh pe sajtā bhī hai ye

maiñ shā.ir huuñ jo ki faūlun faūlun se bahr-e-ramal tak

har ik naġhmagī kā mukammal ḳhudā huuñ

maiñ lafzoñ kā aaqā

taḳhayyul kā ḳhāliq

maiñ saare zamāne se yaksar judā huuñ

mujhe zeb detā hai maiñ apnī dīvār meñ is tarah se muqayyad rahūñ

yūñhī sayyad rahūñ

mujh pe sajtā hai ye

.

par jo kal shab tire shabnamī se tabassum meñ lipTī huī

ik nazar be-niyāzī se mujh par paḌī

terī pahlī nazar se mirī jān-e-jāñ

merī dīvār meñ ik gaḌhā par paḌ gayā

aur ye hī nahīñ mujh pe vo hī nazar

jab dobāra dobāra dobāra paḌī

merī dīvār meñ zalzale aa ga.e

aur raḳhne shagāfoñ meñ Dhalne lage

mere andar talātum vo ātish-fishāñ

vo bagūle vo tūfāñ vo mahshar bapā thā

ki maiñ vo ki jis ke tahammul kī hikmat kī

fahm-o-latāfat kī tamsīl shāyad kahīñ bhī nahīñ thī

sulagne lagā

apnī hiddat se ḳhud hī pighalne lagā

tujh se kahnā thā ye ki mirī jān-e-jāñ

har sitāre kī apnī kashish hogī lekin

ḳhalāoñ meñ murda sitāroñ kī qismat

vo hawking kī theory ke kaale gaḌhe

vo vahī vo ki jin meñ hai itnī kashish ki makāñ to makāñ

vo zamāñ ko bhī apne lapeTe meñ le leñ

vo hawking kī theory ke kaale gaḌhoñ kī gravity bhī

terī añkhoñ kī gahrī kashish ke muqābil meñ kuchh bhī nahīñ

aur ye to faqat ek dīvār thī

is ko girnā hī thā

terī nazroñ se haarī hai bikhrī paḌī hai

ki dīvār kā reza-reza tirī ik nazar se mirī jaan

ujḌā paḌā hai

maiñ jo devtā-e-anā nargisiyyat kā maarā huā vo jo ḳhud-sar thā

ziddī thā maġhrūr thā

jo faūlun faūlun se bahr-e-ramal tak har ik naġhmagī kā mukammal ḳhudā thā

tirī ik nazar se anāoñ ke arsh-e-mua.allā se sīdhā tire paañv meñ aa ke

bikhrā paḌā hai

main ek dewta-e-ana

nargisiyyat ka mara hua

aur azal se takabbur mein Duba hua

kafi KHud-sar hun

ziddi hun maghrur hun

mere chaaron taraf meri andhi ana ki wo diwar hai

jis mein aane ki aur mujh se milne ki ghulne ki koi ijazat kisi ko nahin hai

tumhein bhi nahin hai

use bhi nahin hai

mujhe bhi nahin hai

main apni ana ki diwaron mein tum se alag ho rahun

mujh pe sajta bhi hai ye

main shair hun jo ki faulun faulun se bahr-e-ramal tak

har ek naghmagi ka mukammal KHuda hun

main lafzon ka aaqa

taKHayyul ka KHaliq

main sare zamane se yaksar juda hun

mujhe zeb deta hai main apni diwar mein is tarah se muqayyad rahun

yunhi sayyad rahun

mujh pe sajta hai ye

par jo kal shab tere shabnami se tabassum mein lipTi hui

ek nazar be-niyazi se mujh par paDi

teri pahli nazar se meri jaan-e-jaan

meri diwar mein ek gaDha par paD gaya

aur ye hi nahin mujh pe wo hi nazar

jab dobara dobara dobara paDi

meri diwar mein zalzale aa gae

aur raKHne shagafon mein Dhalne lage

mere andar talatum wo aatish-fishan

wo bagule wo tufan wo mahshar bapa tha

ki main wo ki jis ke tahammul ki hikmat ki

fahm-o-latafat ki tamsil shayad kahin bhi nahin thi

sulagne laga

apni hiddat se KHud hi pighalne laga

tujh se kahna tha ye ki meri jaan-e-jaan

har sitare ki apni kashish hogi lekin

KHalaon mein murda sitaron ki qismat

wo hawking ki theory ke kale gaDhe

wo wahi wo ki jin mein hai itni kashish ki makan to makan

wo zaman ko bhi apne lapeTe mein le len

wo hawking ki theory ke kale gaDhon ki grawity bhi

teri ankhon ki gahri kashish ke muqabil mein kuchh bhi nahin

aur ye to faqat ek diwar thi

is ko girna hi tha

teri nazron se haari hai bikhri paDi hai

ki diwar ka reza-reza teri ek nazar se meri jaan

ujDa paDa hai

main jo dewta-e-ana nargisiyyat ka mara hua wo jo KHud-sar tha

ziddi tha maghrur tha

jo faulun faulun se bahr-e-ramal tak har ek naghmagi ka mukammal KHuda tha

teri ek nazar se anaon ke arsh-e-mualla se sidha tere panw mein aa ke

bikhra paDa hai