diwar

samundar ḳhaan ik pashtū kā shā.ir

jā rahā thā gaañv se duur ek vīrāne meñ

yak dam ik jhapākā sā huā

aur zehn ke parde pe ik dhuñdlā hayūlā banñe aur miTne lagā

par shūmī-e-qismat qalam hī jeb meñ thā aur na kāġhaz kā koī purza

samundar ḳhaan ruk kar aur ik patthar pe Tik kar miich kar āñkhoñ ko

duniyā aur mā-fīhā se begāna huā

phir shaam ko gaañv ke logoñ ne ajab nazzāra dekhā

Dhalte sāyoñ meñ samundar ḳhaan vo pashtū kā shā.ir

Dagmagātā hāñptā apne pasīne meñ nahātā

piiTh par do man kī ik chaTTān laade

gaañv kī sarhad meñ dāḳhil ho rahā hai

aur us ke baa'd aadat ban ga.ī us kī

samundar ḳhaan vīrāne se bhārī sil

koī jab tak uThā ke ghar na laatā thā

to us par nazm kī ik satr tak ilqā na hotī thī

so rafta rafta us kī koTharī dālān aur chhat

an-ghaḌī be-Dhab siloñ ke bojh se dabte ga.e

ik din samundar ḳhaan vo pashtū kā shā.ir

khurdurī nazmoñ ke us ambār ke nīche dhañsā paayā gayā

samundar KHan ek pashtu ka shair

ja raha tha ganw se dur ek virane mein

yak dam ek jhapaka sa hua

aur zehn ke parde pe ek dhundla hayula banne aur miTne laga

par shumi-e-qismat qalam hi jeb mein tha aur na kaghaz ka koi purza

samundar KHan ruk kar aur ek patthar pe Tik kar mich kar aankhon ko

duniya aur ma-fiha se begana hua

phir sham ko ganw ke logon ne ajab nazzara dekha

Dhalte sayon mein samundar KHan wo pashtu ka shair

Dagmagata hanpta apne pasine mein nahata

piTh par do man ki ek chaTTan lade

ganw ki sarhad mein daKHil ho raha hai

aur us ke ba'd aadat ban gai us ki

samundar KHan virane se bhaari sil

koi jab tak uTha ke ghar na lata tha

to us par nazm ki ek satr tak ilqa na hoti thi

so rafta rafta us ki koThari dalan aur chhat

an-ghaDi be-Dhab silon ke bojh se dabte gae

ek din samundar KHan wo pashtu ka shair

khurduri nazmon ke us ambar ke niche dhansa paya gaya