dilli tere nam

kitnī baar ujāḌā tujh ko kitnī baar basāyā hai

achchhī aur burī qismat kā dillī tujh par saayā hai

taḳht-o-tāj kī duniyā tujh ko raas hamesha aa.ī hai

tere sar par to jhanDe kī chunarī hī lahrā.ī hai

'mīr' kā sher-o-naġhma tū ne qadam qadam par gaayā hai

'ġhālib' ke ehsās ne terā ā.īna chamkāyā hai

'dāġh' kī ġhazleñ sun sun kar jhūme haiñ tere bām-o-dar

dād-e-suḳhan ke kyā kyā manzar dekh chukī hai terī nazar

urdu jis kā naam hai vo terī hī god kī paalī hai

bāġh-e-suḳhan meñ tere dam se ravish ravish hariyālī hai

terī galiyāñ rashk-e-jannat tere kūche svarg samān

dillī terā naam hai lekin tū hai shān-e-hindostān

niiñd kī tū hai ujlī chādar ḳhvāboñ kā gahvāra hai

terī dhartī kā har zarra dil vāloñ ko pyārā hai

chāñd ke jaisā terā chehrā sūraj jaisī terī jabīñ

tere jaisā shahr zamīñ par dūsrā koī aur nahīñ

sach pūchho to dillī kī qismat ke rang nirāle haiñ

hindū muslim sikh īsā.ī is ke chāhne vaale haiñ

dillī kyā hai dil vāloñ kī āñkhoñ kā ik sapnā hai

is bastī kā har bāshinda jaise koī apnā hai

ham bhī 'nazīr' ab jā kar ik din dillī meñ bas jā.eñge

aur kisī din ham bhī dillī vaale hī kahlā.eñge

kitni bar ujaDa tujh ko kitni bar basaya hai

achchhi aur buri qismat ka dilli tujh par saya hai

taKHt-o-taj ki duniya tujh ko ras hamesha aai hai

tere sar par to jhanDe ki chunari hi lahrai hai

'mir' ka sher-o-naghma tu ne qadam qadam par gaya hai

'ghaalib' ke ehsas ne tera aaina chamkaya hai

'dagh' ki ghazlen sun sun kar jhume hain tere baam-o-dar

dad-e-suKHan ke kya kya manzar dekh chuki hai teri nazar

urdu jis ka nam hai wo teri hi god ki pali hai

bagh-e-suKHan mein tere dam se rawish rawish hariyali hai

teri galiyan rashk-e-jannat tere kuche swarg saman

dilli tera nam hai lekin tu hai shan-e-hindostan

nind ki tu hai ujli chadar KHwabon ka gahwara hai

teri dharti ka har zarra dil walon ko pyara hai

chand ke jaisa tera chehra suraj jaisi teri jabin

tere jaisa shahr zamin par dusra koi aur nahin

sach puchho to dilli ki qismat ke rang nirale hain

hindu muslim sikh isai is ke chahne wale hain

dilli kya hai dil walon ki aankhon ka ek sapna hai

is basti ka har bashinda jaise koi apna hai

hum bhi 'nazir' ab ja kar ek din dilli mein bas jaenge

aur kisi din hum bhi dilli wale hi kahlaenge