din

din guzarte haiñ

din kaise guzarte haiñ

yuuñ to sab hī din guzar jaate haiñ

jo zinda haiñ

vo to guzārte haiñ

zalīl hote hue

kabhī bhuuk ke hāthoñ

kabhī chāroñ taraf phailī un vabāoñ

kī sarparastī meñ

jo ḳhudā ban jaatī haiñ

saffāk be-rahmī ke libās meñ

gharoñ kī muñDeroñ par chaltī haiñ

chhalāvoñ kī tarah

chabātī haiñ maaoñ ke kaleje

chīrtī haiñ nanhe bachchoñ kā dil

apnī kisī ziyāfat meñ pesh karne ke liye

apnī hī jaisī balāoñ ko

nahīñ rok saktā koī unheñ

vo bhī jo un kā ḳhudā hai

vo bulāte haiñ apne ḳhudā ko bhī

is ziyāfat meñ

shāyad vo bhī insānī gosht kā

shauqīn hai

aur uksātā hai unheñ

jab jab use ishtihā hotī hai

un kā ḳhudā

sirf un kā ḳhudā hai

un kā nahīñ

jin ke kaleje chabā.e jā rahe haiñ

din guzarte hain

din kaise guzarte hain

yun to sab hi din guzar jate hain

jo zinda hain

wo to guzarte hain

zalil hote hue

kabhi bhuk ke hathon

kabhi chaaron taraf phaili un wabaon

ki sarparasti mein

jo KHuda ban jati hain

saffak be-rahmi ke libas mein

gharon ki munDeron par chalti hain

chhalawon ki tarah

chabaati hain maon ke kaleje

chirti hain nanhe bachchon ka dil

apni kisi ziyafat mein pesh karne ke liye

apni hi jaisi balaon ko

nahin rok sakta koi unhen

wo bhi jo un ka KHuda hai

wo bulate hain apne KHuda ko bhi

is ziyafat mein

shayad wo bhi insani gosht ka

shauqin hai

aur uksata hai unhen

jab jab use ishtiha hoti hai

un ka KHuda

sirf un ka KHuda hai

un ka nahin

jin ke kaleje chabae ja rahe hain