din nikalta hai

din nikaltā hai kisī ujle kabūtar kī tarah

aaj kis ne mere dil par haath rakkhā dhuup ke par kī tarah

ghanTiyāñ bajne lagīñ

ek darvāza khulā

aaj mere haath meñ ik phuul hai

log utreñge pahāḌoñ se kisī din shahd ke pyāle liye

ghuḌ-savāroñ ke qadam se jagmagā.eñge babūl

hoñTh kholeñge rasūl

shā'irī kā saath hai

ik parī kā haath hai

jis kī uñglī meñ añgūThī jagmagātī hai kisī dil kī tarah

dil kī tah meñ ik samundar hai jise bedār karnā hai mujhe

paar karnā hai mujhe

us kināre jā.ūñgā

giit aur ummīd le kar ā.ūñgā

tum yahāñ is sunhare pul se mujhe āvāz denā

zindagī ik shor hai hañste hue ghar kī tarah

din nikaltā hai kisī ujle kabūtar kī tarah

din nikalta hai kisi ujle kabutar ki tarah

aaj kis ne mere dil par hath rakkha dhup ke par ki tarah

ghanTiyan bajne lagin

ek darwaza khula

aaj mere hath mein ek phul hai

log utrenge pahaDon se kisi din shahd ke pyale liye

ghuD-sawaron ke qadam se jagmagaenge babul

honTh kholenge rasul

sha'iri ka sath hai

ek pari ka hath hai

jis ki ungli mein anguThi jagmagati hai kisi dil ki tarah

dil ki tah mein ek samundar hai jise bedar karna hai mujhe

par karna hai mujhe

us kinare jaunga

git aur ummid le kar aaunga

tum yahan is sunhare pul se mujhe aawaz dena

zindagi ek shor hai hanste hue ghar ki tarah

din nikalta hai kisi ujle kabutar ki tarah