do din ki chandni

vo ek din thā ki saarī duniyā ne aa ke tahzīb ham se sīkhī

ye ek din hai ki ham meñ ab husn-e-zāhirī hai na bātinī hai

vo ek din thā ki saarā aalam baḌhātā thā haath dostī kā

ye ek din hai ki ham se yāroñ ko aaj nafrat hai dushmanī hai

vo ek din thā ki ġhair qaumoñ se bhī hamārā thā bhā.ī-chāra

ye ek din hai ki aaj bhaa.ī kī apne bhaa.ī se bad-zanī hai

vo ek din thā ki apne ishrat-kadoñ pe raunaq baras rahī thī

ye ek din hai ki aaj apne gharoñ pe hirmāñ kī chhāvnī hai

vo ek din thā ki ham ne jamhūriyat kī ta.alīm aam kī thī

ye ek din hai ki aaj zindāñ hai aur zanjīr āhanī hai

vo ek din thā ki zindagī apnī kaT rahī thī hañsī-ḳhushī meñ

ye ek din hai ki jiite jī mar chuke haiñ chehre pe murdanī hai

jo vo zamāna nahīñ rahā hai to ye zamāna bhī kaT rahegā

uruuj do din kā mehmāñ hai faroġh do din kī chāñdnī hai

wo ek din tha ki sari duniya ne aa ke tahzib hum se sikhi

ye ek din hai ki hum mein ab husn-e-zahiri hai na baatini hai

wo ek din tha ki sara aalam baDhata tha hath dosti ka

ye ek din hai ki hum se yaron ko aaj nafrat hai dushmani hai

wo ek din tha ki ghair qaumon se bhi hamara tha bhai-chaara

ye ek din hai ki aaj bhai ki apne bhai se bad-zani hai

wo ek din tha ki apne ishrat-kadon pe raunaq baras rahi thi

ye ek din hai ki aaj apne gharon pe hirman ki chhawni hai

wo ek din tha ki hum ne jamhuriyat ki talim aam ki thi

ye ek din hai ki aaj zindan hai aur zanjir aahani hai

wo ek din tha ki zindagi apni kaT rahi thi hansi-KHushi mein

ye ek din hai ki jite ji mar chuke hain chehre pe murdani hai

jo wo zamana nahin raha hai to ye zamana bhi kaT rahega

uruj do din ka mehman hai farogh do din ki chandni hai