dozaKH

mauj-e-sahbā meñ tamannā ke safīne kho kar

naġhma o raqs kī mahfil se jo ghabrā ke uThā

ek hañstī huī guḌiyā ne ishāre se kahā

tum jo chāho to maiñ shab bhar kī rifāqat baḳhshūñ

jumbish-e-abrū ne alfāz kī zahmat bhī na dī

nīm-vā āñkhoñ meñ ik dāvat-e-ḳhāmosh liye

yuuñ simaT kar mirī āġhosh meñ aa.ī jaise

bharī duniyā meñ bas ik gosha-e-rāhat thā yahī

ham bhī vīrān guzargāhoñ pe chalte chalte

ghar tak aa.e to koī rañg-e-takalluf hī na thā

do badan milte hī yuuñ hamdam-e-derīna bane

tandahi-e-shauq meñ duurī kā har ehsās miTā

sub.h ke saath khulī aañkh to ehsās huā

mere siine meñ koī chiiz thī jo TuuT ga.ī

der se dekh rahī thī tirī tasvīr mujhe

tere aariz pe thī bahte hue ashkoñ kī namī

terī ḳhāmosh nigāhoñ meñ koī shikva na thā

dekhte dekhte vīrāni-e-dil aur baḌhī

terī tasvīr ko siine se lagā kar pūchhā

kis tarab-zār meñ āsūda hai ai rāhat-e-zīst

mujhe in aag ke shāloñ meñ kahāñ chhoḌ ga.ī

mauj-e-sahba mein tamanna ke safine kho kar

naghma o raqs ki mahfil se jo ghabra ke uTha

ek hansti hui guDiya ne ishaare se kaha

tum jo chaho to main shab bhar ki rifaqat baKHshun

jumbish-e-abru ne alfaz ki zahmat bhi na di

nim-wa aankhon mein ek dawat-e-KHamosh liye

yun simaT kar meri aaghosh mein aai jaise

bhari duniya mein bas ek gosha-e-rahat tha yahi

hum bhi viran guzargahon pe chalte chalte

ghar tak aae to koi rang-e-takalluf hi na tha

do badan milte hi yun hamdam-e-derina bane

tandahi-e-shauq mein duri ka har ehsas miTa

subh ke sath khuli aankh to ehsas hua

mere sine mein koi chiz thi jo TuT gai

der se dekh rahi thi teri taswir mujhe

tere aariz pe thi bahte hue ashkon ki nami

teri KHamosh nigahon mein koi shikwa na tha

dekhte dekhte virani-e-dil aur baDhi

teri taswir ko sine se laga kar puchha

kis tarab-zar mein aasuda hai ai rahat-e-zist

mujhe in aag ke shaalon mein kahan chhoD gai