drawing-room

dūdhiyā rañg ke qumqume

dūdhiyā raushnī

jāmunī rañg shīshoñ pe ye raushnī kā dhuāñ

zehn kī dhīmī dhīmī sulagtī huī aag kā imtihāñ

kuchh gray rañg ke suiT

kuchh champa.ī sāriyāñ

dast-e-nāzuk meñ dast-e-sabā adh-khilī

ḳhvāb-ālud āñkhoñ meñ afsāne

nā-ḳhvāsta guftugū

ham-nashīnī se añgḌā.ī ke saath pahlū tahī

jazb kartī pasīne ko barqī havā

sarsarāte hue āñchaloñ se

shafaq rañg jismoñ kī uThtī mahak

aur latā ek mānūs āvāz kī dhaar

classici lahroñ se uTh kar diloñ meñ utartī huī

naġhmagī shahd āhañg hai

naġhmagī nik.hat-o-rañg hai

mez par sho.ala-e-tūr hai

sartre self meñ band hai

kaag uḌātī huī botaloñ kā surūr

āgahī ke liye zahr hai

dudhiya rang ke qumqume

dudhiya raushni

jamuni rang shishon pe ye raushni ka dhuan

zehn ki dhimi dhimi sulagti hui aag ka imtihan

kuchh gray rang ke suiT

kuchh champai sariyan

dast-e-nazuk mein dast-e-saba adh-khili

KHwab-alud aankhon mein afsane

na-KHwasta guftugu

ham-nashini se angDai ke sath pahlu tahi

jazb karti pasine ko barqi hawa

sarsaraate hue aanchalon se

shafaq rang jismon ki uThti mahak

aur lata ek manus aawaz ki dhaar

classici lahron se uTh kar dilon mein utarti hui

naghmagi shahd aahang hai

naghmagi nikhat-o-rang hai

mez par shoala-e-tur hai

sartre self mein band hai

kag uDati hui botalon ka surur

aagahi ke liye zahr hai