dua

din amn-o-āshatī kā manāeñge agle saal

rūThe diloñ ko phir se milā.eñge agle saal

bārūd par jo paise hue ḳharch is baras

iflās-o-bhūk in se miTā.eñge agle saal

har shaḳhs jis ko dekh ke samjhe hai merā ghar

kuchh is tarah se ghar ko sajā.eñge agle saal

jo ho gayā so ho gayā aao kareñ ye ahd

apne tamām va.ade nibhā.eñge agle saal

tum us se gar miloge to ham tum se kyoñ mileñ

aise tamām jhagḌe miTā.eñge agle saal

ḳhākī kafan pahan ke jo sarhad pe jā base

hai ye duā vo lauT ke ā.eñge agle saal

ik baar aur dekh leñ jī bhar ke us taraf

ham apnī ḳhvāhishoñ ko sulā.eñge agle saal

chand aur zāviyoñ se paḌheñge abhī unheñ

ḳhat tere yaar saare jalā.eñge agle saal

is saal to haiñ zaḳhm hare yādoñ ke 'adīl'

koshish ye hai ki tujh ko bhulā.eñge agle saal

din amn-o-ashati ka manaenge agle sal

ruThe dilon ko phir se milaenge agle sal

barud par jo paise hue KHarch is baras

iflas-o-bhuk in se miTaenge agle sal

har shaKHs jis ko dekh ke samjhe hai mera ghar

kuchh is tarah se ghar ko sajaenge agle sal

jo ho gaya so ho gaya aao karen ye ahd

apne tamam wade nibhaenge agle sal

tum us se gar miloge to hum tum se kyon milen

aise tamam jhagDe miTaenge agle sal

KHaki kafan pahan ke jo sarhad pe ja base

hai ye dua wo lauT ke aaenge agle sal

ek bar aur dekh len ji bhar ke us taraf

hum apni KHwahishon ko sulaenge agle sal

chand aur zawiyon se paDhenge abhi unhen

KHat tere yar sare jalaenge agle sal

is sal to hain zaKHm hare yaadon ke 'adil'

koshish ye hai ki tujh ko bhulaenge agle sal