duniya ko kahan tak jaana hai

duniyā ko kahāñ tak jaanā hai

ye kitnā baḌā afsāna hai

sab kaan lagā.e baiThe haiñ

aur raat saraktī jaatī hai

ye raat kahāñ tak jaanī hai

kuchh is kā or-o-chhor nahīñ

ye raat samundar hai jis meñ

āvāz bahut hai rone kī

bas duur tilak tārīkī hai

kuchh duur zarā sī raushaniyāñ

phir tārīkī phir raushaniyāñ

ye raat balā kī maayā hai

jo kuchh kā kuchh kar detī hai

āñkhoñ ko jagātī hai barsoñ

phir niiñd kā dhakkā detī hai

phir ḳhvāb dikhātī hai barsoñ

phir ḳhvāboñ se chauñkātī hai

ye khel bhayānak rātoñ kā

insān kī nannhī zātoñ kā

ḳhush honā aur dahal jaanā

phir aañsū aañsū gal jaanā

is khel meñ jo bhī haar gayā

phir muTThī se sansār gayā

is khel meñ phañsnā hai pyāre

bas haath meñ jitnī miTTī hai

us miTTī se sansār banā

use apne aañsū kā paanī

use apne hijr kī garmī de

use mausam mausam narmī de

ise apne añg lagā pyāre

use apne rañg lagā pyāre

duniyā ko kahāñ tak jaanā hai

ye kitnā baḌā afsāna hai

ye bhed na koī jaan sakā

is bhed kā chakkar bhārī hai

duniya ko kahan tak jaana hai

ye kitna baDa afsana hai

sab kan lagae baiThe hain

aur raat sarakti jati hai

ye raat kahan tak jaani hai

kuchh is ka or-o-chhor nahin

ye raat samundar hai jis mein

aawaz bahut hai rone ki

bas dur tilak tariki hai

kuchh dur zara si raushaniyan

phir tariki phir raushaniyan

ye raat bala ki maya hai

jo kuchh ka kuchh kar deti hai

aankhon ko jagati hai barson

phir nind ka dhakka deti hai

phir KHwab dikhati hai barson

phir KHwabon se chaunkati hai

ye khel bhayanak raaton ka

insan ki nannhi zaton ka

KHush hona aur dahal jaana

phir aansu aansu gal jaana

is khel mein jo bhi haar gaya

phir muTThi se sansar gaya

is khel mein phansna hai pyare

bas hath mein jitni miTTi hai

us miTTi se sansar bana

use apne aansu ka pani

use apne hijr ki garmi de

use mausam mausam narmi de

ise apne ang laga pyare

use apne rang laga pyare

duniya ko kahan tak jaana hai

ye kitna baDa afsana hai

ye bhed na koi jaan saka

is bhed ka chakkar bhaari hai