duri

tum bhī ab na miTā pāoge

shāyad merī tanhā.ī ko

mere lahū kī saarī būñde

birah kī aag meñ jaltī haiñ

mere aañsū ke sab chashme

merī āñkhoñ ke sab motī

zahr ke ik gahre sāgar meñ

jā jā kar kho jaate haiñ

kitnī rāhat pahuñchātī hai

saañs tumhārī qurbat kī

aur tumhāre pahlū meñ

kitnī nashe se bojhal nīñdeñ

lorī mujh ko sunātī haiñ

haa.e vo rāteñ haa.e vo lamhe

haa.e vo un kī shīrīnī

tum se mil kar tum se lipaT kar

lag ke tumhāre siine se jab

thoḌī der ko so jaatā huuñ

tum ko pā kar kho jaatā huuñ

aisī gahrī nīñdeñ phir bhī

jaane aisā kyoñ lagtā hai

mere man ke andar jaise

koī ab bhī jaag rahā hai

koī ab bhī tum se judā hai

koī ab bhī mash'al le kar

raah tumhārī dekh rahā hai

tum bhi ab na miTa paoge

shayad meri tanhai ko

mere lahu ki sari bunde

birah ki aag mein jalti hain

mere aansu ke sab chashme

meri aankhon ke sab moti

zahr ke ek gahre sagar mein

ja ja kar kho jate hain

kitni rahat pahunchati hai

sans tumhaari qurbat ki

aur tumhaare pahlu mein

kitni nashe se bojhal ninden

lori mujh ko sunati hain

hae wo raaten hae wo lamhe

hae wo un ki shirini

tum se mil kar tum se lipaT kar

lag ke tumhaare sine se jab

thoDi der ko so jata hun

tum ko pa kar kho jata hun

aisi gahri ninden phir bhi

jaane aisa kyon lagta hai

mere man ke andar jaise

koi ab bhi jag raha hai

koi ab bhi tum se juda hai

koi ab bhi mash'al le kar

rah tumhaari dekh raha hai