duri

mirī nazar meñ hai ab tak vo shaam vo mahfil

vo ik hujūm-e-tarb vo nashāt-e-naġhma-o-nūr

sharīr laḌkiyāñ rañgīn titliyāñ betāb

laboñ pe gul-kada-e-guftugū khilā.e hue

vo qahqahe vo masarrat kī nuqra.ī jhankār

aur is hujūm meñ tum jaise gulsitāñ meñ bahār

maiñ apne gosha-e-kam-tāb meñ hujūm se duur

udaas nazroñ meñ maddham diye jalā.e hue

tum aa.iiñ hañstī huī aa.iiñ barq ke mānind

mire qarīb se kitnī qarīb se guzrīñ

bhaḌaktā sho.ala thā jaise vo gosha-e-kam-tāb

mire qarīb ho aur kis qadar qarīb ho aaj

nazar nazar meñ liye qahqahoñ kī tābānī

fazā meñ chāñd kī kirneñ nikhar ke bikhrī haiñ

magar kabhī kabhī jis tarah koī saaya sā

tumhārī palkoñ se kuchh kah ke lauT jaatā hai

dabī dabī vahī sargoshiyāñ vahī āvāz

ki is jamāl o masarrat kī tah meñ pinhāñ hai

vo rūh-e-tīra jise ik kiran nasīb nahīñ

mire qarīb ho aur kitnī duur ho mujh se

ḳhushī kā saath to hai āñsuoñ kā saath nahīñ

hañso aur itnā hañso tum baras paḌeñ āñkheñ

phir in sulagte hue āñsuoñ meñ bah jaa.e

vo dard aur vo duurī jo qahqahoñ meñ hai

meri nazar mein hai ab tak wo sham wo mahfil

wo ek hujum-e-tarb wo nashat-e-naghma-o-nur

sharir laDkiyan rangin titliyan betab

labon pe gul-kada-e-guftugu khilae hue

wo qahqahe wo masarrat ki nuqrai jhankar

aur is hujum mein tum jaise gulsitan mein bahaar

main apne gosha-e-kam-tab mein hujum se dur

udas nazron mein maddham diye jalae hue

tum aain hansti hui aain barq ke manind

mere qarib se kitni qarib se guzrin

bhaDakta shoala tha jaise wo gosha-e-kam-tab

mere qarib ho aur kis qadar qarib ho aaj

nazar nazar mein liye qahqahon ki tabani

faza mein chand ki kirnen nikhar ke bikhri hain

magar kabhi kabhi jis tarah koi saya sa

tumhaari palkon se kuchh kah ke lauT jata hai

dabi dabi wahi sargoshiyan wahi aawaz

ki is jamal o masarrat ki tah mein pinhan hai

wo ruh-e-tira jise ek kiran nasib nahin

mere qarib ho aur kitni dur ho mujh se

KHushi ka sath to hai aansuon ka sath nahin

hanso aur itna hanso tum baras paDen aankhen

phir in sulagte hue aansuon mein bah jae

wo dard aur wo duri jo qahqahon mein hai