dusra tajraba

kal shab ajiib adā se thā ik husn mehrbāñ

vo shabnamī gulāb sī rañgat dhulī dhulī

shānoñ pe be-qarār vo zulfeñ khulī khulī

har ḳhat-e-jism pairahan-e-chust se ayaañ

Thahre bhī gar nigāh to Thahre kahāñ kahāñ

har zāviye meñ husn kā ik taaza bāñkpan

har dā.ere meñ khilte hue phuul kī phaban

āñkhoñ meñ Dolte hue nashshe kī kaifiyat

rū-e-hasīñ pe ek shikasta sī tamkanat

hoñToñ pe an-kahī sī tamannā kī larzisheñ

bāñhoñ meñ lamha lamha simaTne kī kāvisheñ

siine ke jazr-o-mad meñ samundar sā iztirāb

umDā huā sā jazba-e-bedār kā azaab

ḳhushbū tavāf-e-qāmat-e-zebā kiye hue

shīsha badan kā azm-e-zuleḳhā liye hue

phir yuuñ huā ki chhiḌ ga.ī yūsuf kī dāstāñ

phir maiñ thā aur pākī-e-dāman kā imtihāñ

ik saañp bhī thā aadam o havvā ke darmiyāñ

kal shab ajib ada se tha ek husn mehrban

wo shabnami gulab si rangat dhuli dhuli

shanon pe be-qarar wo zulfen khuli khuli

har KHat-e-jism pairahan-e-chust se ayan

Thahre bhi gar nigah to Thahre kahan kahan

har zawiye mein husn ka ek taza bankpan

har daere mein khilte hue phul ki phaban

aankhon mein Dolte hue nashshe ki kaifiyat

ru-e-hasin pe ek shikasta si tamkanat

honTon pe an-kahi si tamanna ki larzishen

banhon mein lamha lamha simaTne ki kawishen

sine ke jazr-o-mad mein samundar sa iztirab

umDa hua sa jazba-e-bedar ka azab

KHushbu tawaf-e-qamat-e-zeba kiye hue

shisha badan ka azm-e-zuleKHa liye hue

phir yun hua ki chhiD gai yusuf ki dastan

phir main tha aur paki-e-daman ka imtihan

ek sanp bhi tha aadam o hawwa ke darmiyan