etiraf

maiñ ne bikhre hue alfāz ko yakjā kar ke

zehn ko chaa.e ke do ghūñT se bedār kiyā

aur phir sher kahā

ye zamāna kabhī vahshī na darinda hotā

is ke siine meñ koī dil bhī jo zinda hotā

mere ash.ār risāloñ meñ chhape

bazm-e-ahbāb meñ dohrā.e ga.e

naqd-o-tahsīn ke mīzānoñ par

bārhā mere suḳhan laa.e ga.e

mujh ko ma.alūm nahīñ

vo zamāna jo darinda thā kahāñ tak pahūñchā

maiñ to bas

haath par haath dhare

sitam-o-jaur-e-shab-o-roz-e-zamāna se pare

sher kahtā rahā afzā.ish-e-fan kī ḳhātir

aur sunātā rahā tash.hīr-e-suḳhan kī ḳhātir

main ne bikhre hue alfaz ko yakja kar ke

zehn ko chae ke do ghunT se bedar kiya

aur phir sher kaha

ye zamana kabhi wahshi na darinda hota

is ke sine mein koi dil bhi jo zinda hota

mere ashaar risalon mein chhape

bazm-e-ahbab mein dohrae gae

naqd-o-tahsin ke mizanon par

barha mere suKHan lae gae

mujh ko malum nahin

wo zamana jo darinda tha kahan tak pahuncha

main to bas

hath par hath dhare

sitam-o-jaur-e-shab-o-roz-e-zamana se pare

sher kahta raha afzaish-e-fan ki KHatir

aur sunata raha tashhir-e-suKHan ki KHatir