etiraf

kabhī aisā bhī hotā hai

savāloñ kī koī ik bhiiḌ

mujh ko gher letī hai

to ye mahsūs hotā hai

ki maiñ pābandiyoñ ke is qafas ko

toḌ kar bāhar nikal aa.uuñ

maiñ is duniyā ko dekhūñ

aur bahut nazdīk se dekhūñ

zehn meñ kulbulāte un

savāloñ ke bhī hal DhūñDūñ

jo kuchh mere haiñ aur kuchh

dūsroñ ne mujh se pūchhe hai

kisī ko justujū hai us vajūd-e-pāk ko jaane

tazabzub meñ koī hai us ko maane bhī to kyuuñ maane

agar vo hai to is duniyā meñ

bad-ā.māliyāñ kyuuñ haiñ

agar vo hai to insānoñ meñ

ye bad-kāriyāñ kyuuñ haiñ

yahāñ bachpan hai dahshat meñ

javānī bhī hai ḳhatre meñ

hai kuchh māhaul bhī aisā

ki paanī bhī hai ḳhatre meñ

agar vo hai to phir kyuuñ

ḳhāmushī kī hai ridā oḌhe

agar vo hai to phir hālāt kī

gutthī ko suljhā.e

na jaane kitne aise hī

savāloñ ne kiye hamle

to maiñ ne ye tajassus

aql ke mīzān meñ tole

mujhe lagne lagā ye kaise behis log haiñ

jin ko nahiñ ehsās ne.amat kā

na bahroñ ke ḳhazānoñ kā

na ūñchī un chaTānoñ kā

na kohsāroñ kī azmat kā

na us getī kī vus.at kā

parindoñ ke tarānoñ kā

na jañgal kā makānoñ kā

na paidā.ish na rehlat kā

mohabbat aur shafqat kā

ki duniyā ke har ik zarre meñ

us kā nuur pinhāñ hai

añdherā ho jahāñ vo

nuur kī sūrat numāyāñ hai

ḳhushī aur ġham hamāre

imtihānoñ kī hī shakleñ haiñ

ki ham us ke diye aa.iin ko

kitnā samajhte haiñ

hamāre sabr dushvārī kī

choT choT sahte haiñ

kahāñ ham laḌkhaḌāte haiñ

kahāñ se bach nikalte haiñ

use pahchānñā āsān nahīñ lekin

vajūd-e-Haq numāyāñ hai

azal se aaj tak ye jā-ba-jā

lamha-ba-lamha pai-ba-pai

mahsūs hotā hai ki vo

shah-e-rag se hai nazdīk

aur a.amāl par nazreñ

use hai fikr ḳhilqat kī

aur insāf-o-adālat kī

vo haadī hai har ik shai kā

muhāfiz hai har ik shai kā

ki jab in zalzaloñ se

apnī dhartī kaañp uThtī thī

jahāñ lāsheñ hī lāsheñ thiiñ

vahāñ chaubīs ghanToñ tak

vo ek nannhī sī jaañ ko

iiñT aur patthar ke malbe meñ

atā kartā hai sāñseñ

aur us ko zinda rakhtā hai

to sar sajde meñ jhukte hai

aqīda aur bhī mazbūt hotā hai

kabhi aisa bhi hota hai

sawalon ki koi ek bhiD

mujh ko gher leti hai

to ye mahsus hota hai

ki main pabandiyon ke is qafas ko

toD kar bahar nikal aaun

main is duniya ko dekhun

aur bahut nazdik se dekhun

zehn mein kulbulate un

sawalon ke bhi hal DhunDun

jo kuchh mere hain aur kuchh

dusron ne mujh se puchhe hai

kisi ko justuju hai us wajud-e-pak ko jaane

tazabzub mein koi hai us ko mane bhi to kyun mane

agar wo hai to is duniya mein

bad-amaliyan kyun hain

agar wo hai to insanon mein

ye bad-kariyan kyun hain

yahan bachpan hai dahshat mein

jawani bhi hai KHatre mein

hai kuchh mahaul bhi aisa

ki pani bhi hai KHatre mein

agar wo hai to phir kyun

KHamushi ki hai rida oDhe

agar wo hai to phir haalat ki

gutthi ko suljhae

na jaane kitne aise hi

sawalon ne kiye hamle

to main ne ye tajassus

aql ke mizan mein tole

mujhe lagne laga ye kaise behis log hain

jin ko nahin ehsas neamat ka

na bahron ke KHazanon ka

na unchi un chaTanon ka

na kohsaron ki azmat ka

na us geti ki wusat ka

parindon ke taranon ka

na jangal ka makanon ka

na paidaish na rehlat ka

mohabbat aur shafqat ka

ki duniya ke har ek zarre mein

us ka nur pinhan hai

andhera ho jahan wo

nur ki surat numayan hai

KHushi aur gham hamare

imtihanon ki hi shaklen hain

ki hum us ke diye aain ko

kitna samajhte hain

hamare sabr dushwari ki

choT choT sahte hain

kahan hum laDkhaDate hain

kahan se bach nikalte hain

use pahchanna aasan nahin lekin

wajud-e-Haq numayan hai

azal se aaj tak ye ja-ba-ja

lamha-ba-lamha pai-ba-pai

mahsus hota hai ki wo

shah-e-rag se hai nazdik

aur aamal par nazren

use hai fikr KHilqat ki

aur insaf-o-adalat ki

wo hadi hai har ek shai ka

muhafiz hai har ek shai ka

ki jab in zalzalon se

apni dharti kanp uThti thi

jahan lashen hi lashen thin

wahan chaubis ghanTon tak

wo ek nannhi si jaan ko

inT aur patthar ke malbe mein

ata karta hai sansen

aur us ko zinda rakhta hai

to sar sajde mein jhukte hai

aqida aur bhi mazbut hota hai