ehsas

raat plate meñ dukh rakkhā thā

sub.h ke cup meñ be-zārī thī

shaam chaa.e ke saath paḌā thā

dil kī sūrat vaalā barfī kā ik TukḌā

aaj mire kamre meñ phir se hijr kī Table par

dil kā piyāla yuuñ ashkoñ se bharā huā thā

andar se kuchh TuuT gayā thā

aur ik jag yādoñ se bharā merī jānib dekh rahā thā

ek gilās thakan kā ḳhālī

jaise dar se koī savālī

bin paa.e hī lauT gayā thā

niiñd ke takiye par sar rakkhā

mere sirhāne kitāb tumhārī

merā jīvan dam sādhe chup-chāp paḌā thā

maiñ ne jūñhī haath baḌhāyā

lafzoñ se ik chehra ubhrā

raat bahut hī biit chukī hai

ab so jaao

raat plate mein dukh rakkha tha

subh ke cup mein be-zari thi

sham chae ke sath paDa tha

dil ki surat wala barfi ka ek TukDa

aaj mere kamre mein phir se hijr ki Table par

dil ka piyala yun ashkon se bhara hua tha

andar se kuchh TuT gaya tha

aur ek jag yaadon se bhara meri jaanib dekh raha tha

ek gilas thakan ka KHali

jaise dar se koi sawali

bin pae hi lauT gaya tha

nind ke takiye par sar rakkha

mere sirhane kitab tumhaari

mera jiwan dam sadhe chup-chap paDa tha

main ne junhi hath baDhaya

lafzon se ek chehra ubhra

raat bahut hi bit chuki hai

ab so jao