ehsas-e-bahaar

vo bulbul

jo ḳhizāñ-rut meñ

mire ghar ke qarīb

ik peḌ kī Tahnī pe tanhā baiTh kar mujh ko

malāl-o-yās ke naġhme sunātā thā

ḳhushī se aaj pāgal ho rahā hai

sub.h se kaif-o-masarrat ke tarāne gā rahā hai

aur

mire barāmde meñ baar baar aa kar

mujhe uksā rahā hai

apne bistar se uTho

kamre se bāhar kā samāñ dekho

bahār aa.ī hai

dekho har taraf sabza hī sabza hai

gul-o-lāla se dhartī saj ga.ī hai

aur

parinde chahchahāte giit gaate jashn karte phir rahe haiñ

āsmāñ qaus-e-quzah ke saat rangoñ aur patangoñ se muzayyan hai

nazāra karne vāloñ ke liye har samt jannat hai

magar vo bulbul-e-sāda ye kyā jaane

ki jab tak vo gulābī-rū

saped-o-surḳh meñ malbūs vo paikar

vo merī ham-suḳhan ham-rūh jān-e-jāñ

na mere rū-ba-rū hogī

mirā ye dil ki jis par

is samay pazhmurdagī ke gahre saa.e haiñ

ise ehsās-e-fasl-e-gul nahīñ hogā

wo bulbul

jo KHizan-rut mein

mere ghar ke qarib

ek peD ki Tahni pe tanha baiTh kar mujh ko

malal-o-yas ke naghme sunata tha

KHushi se aaj pagal ho raha hai

subh se kaif-o-masarrat ke tarane ga raha hai

aur

mere baramde mein bar bar aa kar

mujhe uksa raha hai

apne bistar se uTho

kamre se bahar ka saman dekho

bahaar aai hai

dekho har taraf sabza hi sabza hai

gul-o-lala se dharti saj gai hai

aur

parinde chahchahate git gate jashn karte phir rahe hain

aasman qaus-e-quzah ke sat rangon aur patangon se muzayyan hai

nazara karne walon ke liye har samt jannat hai

magar wo bulbul-e-sada ye kya jaane

ki jab tak wo gulabi-ru

saped-o-surKH mein malbus wo paikar

wo meri ham-suKHan ham-ruh jaan-e-jaan

na mere ru-ba-ru hogi

mera ye dil ki jis par

is samay pazhmurdagi ke gahre sae hain

ise ehsas-e-fasl-e-gul nahin hoga