id hairan hai

iid mehñdī kā ḳhushiyoñ kā

rañgoñ kā ḳhushbū kā

aur kāñch kī chūḌiyoñ kī khanak

meñ basī ārzūoñ kā ik naam hai

iid in.aam hai

iid ummīd hai

iid tajdīd hai

iid jaise koī raushnī kī kiran

ek va.ade kahānī fasāne kī yā

hijr mausam meñ lipTe hue vasl ke

dukh kī tamhīd hai

iid ummīd hai

ek ghar meñ to ḳhushiyoñ kā sāmān hai

ek ghar meñ magar dukh kā tūfān hai

iid hairān hai

iid hiirā nahīñ iid motī nahīñ

iid hañstī nahīñ iid rotī nahīñ

ek āñgan kahīñ koī aisā bhī hai

jis meñ shahzādī sadiyoñ se sotī nahīñ

shāhzāde kī jab diid hotī nahīñ

iid ke din bhī phir iid hotī nahīñ

id mehndi ka KHushiyon ka

rangon ka KHushbu ka

aur kanch ki chuDiyon ki khanak

mein basi aarzuon ka ek nam hai

id inam hai

id ummid hai

id tajdid hai

id jaise koi raushni ki kiran

ek wade kahani fasane ki ya

hijr mausam mein lipTe hue wasl ke

dukh ki tamhid hai

id ummid hai

ek ghar mein to KHushiyon ka saman hai

ek ghar mein magar dukh ka tufan hai

id hairan hai

id hira nahin id moti nahin

id hansti nahin id roti nahin

ek aangan kahin koi aisa bhi hai

jis mein shahzadi sadiyon se soti nahin

shahzade ki jab did hoti nahin

id ke din bhi phir id hoti nahin