ek aarzu

huzūr merī bisāt kyā hai ki naa't likkhūñ

maiñ aap kā ik bahut gunahgār ummatī huuñ

mirī zabāñ par kasāfateñ haiñ

dimāġh-o-dil meñ ġhalāzateñ haiñ

huzūr merī bisāt kyā hai ki naa't likkhūñ

magar nahīñ maiñ bahut hī 'aalī hasab nasab huuñ

ki aap hī kā ġhulām-e-ibn-e-ġhulām-e-ibn-e-ġhulām huuñ maiñ

bhalā batā.eñ ki mere aage tamām shāhān-e-azminah kī bisāt kyā hai

huzūr ye eqtidār-zāde havas ke bande

maiñ in ke shajre se bā-ḳhabar huuñ ki ḳhvāhishoñ ke ġhulām-e-ibn-e-ġhulām-e-ibn-e-ġhulām haiñ ye

huzūr maiñ in ġhulām-zādoñ ke taḳht-o-tāj aur saltanat ke sabhī tilismāt jāntā huuñ

maiñ in kī auqāt jāntā huuñ

tamām fir'auniyat ke qil’oñ kī aur fasīloñ kī asl buniyād ibn-e-ādam ke ḳhuun aur haDDiyoñ se tā'mīr kī ga.ī hai

magar huzūr aap kī hukūmat tamām shāhoñ se muḳhtalif hai

ki aap ke paas ek chādar hai ek tah-band ik 'amāma

khajūr kī chhāl aur pattoñ kā ek bistar

so ai zamāne ke bādshāho

lo tum bhī dekho ye shāh-e-kaunain kā asāsa

maiñ is zamāne ke saare namrūd aur shaddād aur qārūn aur hāmān aur fir'aun ko dikhā duuñ

ki mere aaqā kī saltanat meñ koī nahīñ hai jo bhuuk se bilbilā rahā ho

huzūr kī mamlikat meñ daulat kā ek hissa ġharīb logoñ kī milkiyat hai

suno rafīqān-e-ishtirākī

tamām jabr-e-ma’āsh kā bas yahī nizām-e-zakāt hal hai

dalit kī mahrūmiyoñ pe aañsū bahāne vaalo

suno ye tārīḳh kah rahī hai

bilāl jaise ġhulām jin ko mahā-dalit se bhī past samjhā gayā 'arab meñ

rasūl-e-rahmat ne aise mahrūm aadmī ko bhī aisā darja 'atā kiyā hai

ḳhalīfa-e-vaqt kā bhī aaqā banā diyā hai

suno ai tānīsyat ke nā're lagāne vaalo

rasūl-e-insāniyat ne mazlūm 'auratoñ ko hayāt baḳhshī

rusūm-e-vahshat ke ḳhūnī panjoñ se un ko rāh-e-najāt baḳhshī

tamām 'izzat vaqār kī kā.enāt baḳhshī

huzūr kyā hai bisāt merī ki naa't likkhūñ

magar maiñ duniyā ke hitleroñ kī samā'atoñ ko jagā rahā huuñ

tamām dahshat-pasand logoñ ko aaj maiñ ye sunā rahā huuñ

tamām insāniyat ke qātil girohoñ ko ye batā rahā huuñ

rasūl-e-rahmat kī zindagī kā ye baab raushan dikhā rahā huuñ

maiñ aaj taa.ef hudaibiya aur fat.h-e-makka kī yaad un ko dilā rahā huuñ

huzūr merī bisāt kyā hai ki naa't likkhūñ

magar mirī ek aarzū hai ki apne ḳhūn-e-jigar se aurāq-e-zindagī par bas aap hī kī sifāt likkhūñ

huzur meri bisat kya hai ki na't likkhun

main aap ka ek bahut gunahgar ummati hun

meri zaban par kasafaten hain

dimagh-o-dil mein ghalazaten hain

huzur meri bisat kya hai ki na't likkhun

magar nahin main bahut hi 'ali hasab nasab hun

ki aap hi ka ghulam-e-ibn-e-ghulam-e-ibn-e-ghulam hun main

bhala bataen ki mere aage tamam shahan-e-azminah ki bisat kya hai

huzur ye eqtidar-zade hawas ke bande

main in ke shajre se ba-KHabar hun ki KHwahishon ke ghulam-e-ibn-e-ghulam-e-ibn-e-ghulam hain ye

huzur main in ghulam-zadon ke taKHt-o-taj aur saltanat ke sabhi tilismat jaanta hun

main in ki auqat jaanta hun

tamam fir'auniyat ke qil’on ki aur fasilon ki asl buniyaad ibn-e-adam ke KHun aur haDDiyon se ta'mir ki gai hai

magar huzur aap ki hukumat tamam shahon se muKHtalif hai

ki aap ke pas ek chadar hai ek tah-band ek 'amama

khajur ki chhaal aur patton ka ek bistar

so ai zamane ke baadshaho

lo tum bhi dekho ye shah-e-kaunain ka asasa

main is zamane ke sare namrud aur shaddad aur qarun aur haman aur fir'aun ko dikha dun

ki mere aaqa ki saltanat mein koi nahin hai jo bhuk se bilbila raha ho

huzur ki mamlikat mein daulat ka ek hissa gharib logon ki milkiyat hai

suno rafiqan-e-ishtiraki

tamam jabr-e-ma’ash ka bas yahi nizam-e-zakat hal hai

dalit ki mahrumiyon pe aansu bahane walo

suno ye tariKH kah rahi hai

bilal jaise ghulam jin ko maha-dalit se bhi past samjha gaya 'arab mein

rasul-e-rahmat ne aise mahrum aadmi ko bhi aisa darja 'ata kiya hai

KHalifa-e-waqt ka bhi aaqa bana diya hai

suno ai tanisyat ke na're lagane walo

rasul-e-insaniyat ne mazlum 'auraton ko hayat baKHshi

rusum-e-wahshat ke KHuni panjon se un ko rah-e-najat baKHshi

tamam 'izzat waqar ki kaenat baKHshi

huzur kya hai bisat meri ki na't likkhun

magar main duniya ke hitleron ki sama'aton ko jaga raha hun

tamam dahshat-pasand logon ko aaj main ye suna raha hun

tamam insaniyat ke qatil girohon ko ye bata raha hun

rasul-e-rahmat ki zindagi ka ye bab raushan dikha raha hun

main aaj taef hudaibiya aur fath-e-makka ki yaad un ko dila raha hun

huzur meri bisat kya hai ki na't likkhun

magar meri ek aarzu hai ki apne KHun-e-jigar se auraq-e-zindagi par bas aap hi ki sifat likkhun