ek aawaz

abhī abhī hī to sapne meñ yuuñ lagā mujh ko

bulā rahī hai koī an-sunī sadā mujh ko

miThās oḌh ke dhīmī sī gungunāhaT kī

na jaane zer-e-lab āvāz kah ga.ī hai kyā

hanūz gosh-bar-āvāz hai dil-e-hairāñ

kisī kī baat adhūrī hī rah ga.ī hai kyā

jhaḌī thī niiñd kī Tahnī se jo sadā kī kalī

ḳhud āgahī ke tamavvuj meñ bah ga.ī hai kyā

ajab nahīñ ki tasavvur se koī parchhā.īñ

nikal ke andhī guphāoñ kī samt lapkī ho

ajab nahīñ ki nam-ālūd shab kī chaukhaT par

samay kī mauj tanaffus ne aañkh jhapkī ho

ajab nahīñ ki sulagte sukūt kī rau meñ

kahīñ se narm sī aahaT kī buuñd Tapkī ho

ajab nahīñ ki kisī adh-khile shagūfe ne

havā ke ūñghte jhoñke kī piiTh thapkī ho

nuqūsh-e-pā meñ kisī ḳhush ḳhirām ne shāyad

sadā-e-pā kā rasīlā sā aks chhoḌā ho

falak se TuuT ke shāyad kisī sitāre ne

sukūt-e-shab ke hasīñ aa.ine ko toḌā ho

tilism-e-yād ne shāyad taraste kānoñ meñ

kisī kī sīm-gūñ sāñsoñ kā ras nichoḌā ho

ajab nahīñ ki mire zehn ke kivāḌoñ se

kisī bhaTaktī sadā ne sar apnā chhoḌā ho

rahī sadā-e-pur-asrār sī na ḳhvāb rahā

rahā ye āḳhir-e-shab shab kā māhtāb rahā

abhi abhi hi to sapne mein yun laga mujh ko

bula rahi hai koi an-suni sada mujh ko

miThas oDh ke dhimi si gungunahaT ki

na jaane zer-e-lab aawaz kah gai hai kya

hanuz gosh-bar-awaz hai dil-e-hairan

kisi ki baat adhuri hi rah gai hai kya

jhaDi thi nind ki Tahni se jo sada ki kali

KHud aagahi ke tamawwuj mein bah gai hai kya

ajab nahin ki tasawwur se koi parchhain

nikal ke andhi guphaon ki samt lapki ho

ajab nahin ki nam-alud shab ki chaukhaT par

samay ki mauj tanaffus ne aankh jhapki ho

ajab nahin ki sulagte sukut ki rau mein

kahin se narm si aahaT ki bund Tapki ho

ajab nahin ki kisi adh-khile shagufe ne

hawa ke unghte jhonke ki piTh thapki ho

nuqush-e-pa mein kisi KHush KHiram ne shayad

sada-e-pa ka rasila sa aks chhoDa ho

falak se TuT ke shayad kisi sitare ne

sukut-e-shab ke hasin aaine ko toDa ho

tilism-e-yaad ne shayad taraste kanon mein

kisi ki sim-gun sanson ka ras nichoDa ho

ajab nahin ki mere zehn ke kiwaDon se

kisi bhaTakti sada ne sar apna chhoDa ho

rahi sada-e-pur-asrar si na KHwab raha

raha ye aaKHir-e-shab shab ka mahtab raha