ek din ki baadshahi

nannhī sī ek guḌiyā rippo daman hamārī

jaisā hai naam un kā vaisī adā.eñ saarī

itnī sī umr meñ bhī fitne uThā.eñ kyā kyā

pinkī ke gaal noche bablū ko jā khasoTā

kis kī majāl un kī zid Taal jaa.e koī

mummy kī ye dulārī ye jaan paapā jī kī

teacher's day meñ ab ke vo ban ga.iiñ principal

kyā yādgār din thā kaisī machī thī halchal

bhārī sī saaḌī bāñdhī sar par baḌā sā juuḌā

ye ruup dekh un kā kāñpā class puurā

ik ik kī note-bōk meñ ġhalatī nikālī us ne

jo do ko maarā thappaḌ to chaar kaan aiñThe

sab sar jhukā.e baiThe rote bisorte the

kal dekh leñge is ko chup-chāp sochte the

lekin hamārī rippo kab kis se ye Darī thī

sab ke nikāle kas-bal ik ik kī kar dī chhuTTī

yuuñ ro.ab jhāḌne meñ vo din magar gayā thā

ik din kī bādshāhī meñ kis qadar mazā thā

nannhi si ek guDiya rippo daman hamari

jaisa hai nam un ka waisi adaen sari

itni si umr mein bhi fitne uThaen kya kya

pinki ke gal noche bablu ko ja khasoTa

kis ki majal un ki zid Tal jae koi

mummy ki ye dulari ye jaan papa ji ki

teacher's day mein ab ke wo ban gain principal

kya yaadgar din tha kaisi machi thi halchal

bhaari si saDi bandhi sar par baDa sa juDa

ye rup dekh un ka kanpa class pura

ek ek ki note-book mein ghalati nikali us ne

jo do ko mara thappaD to chaar kan ainThe

sab sar jhukae baiThe rote bisorte the

kal dekh lenge is ko chup-chap sochte the

lekin hamari rippo kab kis se ye Dari thi

sab ke nikale kas-bal ek ek ki kar di chhuTTi

yun roab jhaDne mein wo din magar gaya tha

ek din ki baadshahi mein kis qadar maza tha