ek din larans bagh mein

baiThā huā huuñ sub.h se larense-bāġh meñ

afkār kā hujūm hai mere dimāġh meñ

chhāyā huā hai chaar taraf baaġh meñ sukūt

tanhā.iyoñ kī god meñ leTā huā huuñ maiñ

ashjār baar baar Darāte haiñ ban ke bhuut

jab dekhtā huuñ un kī taraf kāñptā huuñ maiñ

baiThā huā huuñ sub.h se larense-bāġh meñ

larense-bāġh kaif o latāfat ke ḳhuld-zār

vo mausam-e-nashāt vo ayyām-e-nau-bahār

bhūle hue manāzir-e-rañgīñ bahār ke

afkār ban ke ruuh meñ merī utar ga.e

vo mast giit mausam-e-ishrat-fishār ke

gahrā.iyoñ ko dil kī ġham ābād kar ga.e

larense-bāġh kaif o latāfat ke ḳhuld-zār

hai āsmāñ pe kaalī ghaTāoñ kā izhdihām

hone lagī hai vaqt se pahle hī aaj shaam

duniyā kī aañkh niiñd se jis vaqt jhuk ga.ī

jab kā.enāt kho ga.ī asrār-e-ḳhvāb meñ

siine meñ jū-e-ashk hai mere rukī huī

jā kar use bahā.ūñgā kunj-e-gulāb meñ

hai āsmāñ pe kaalī ghaTāoñ kā izhdihām

afkār kā hujūm hai mere dimāġh meñ

baiThā huā huuñ sub.h se larense-bāġh meñ

baiTha hua hun subh se larense-bagh mein

afkar ka hujum hai mere dimagh mein

chhaya hua hai chaar taraf bagh mein sukut

tanhaiyon ki god mein leTa hua hun main

ashjar bar bar Daraate hain ban ke bhut

jab dekhta hun un ki taraf kanpta hun main

baiTha hua hun subh se larense-bagh mein

larense-bagh kaif o latafat ke KHuld-zar

wo mausam-e-nashat wo ayyam-e-nau-bahaar

bhule hue manazir-e-rangin bahaar ke

afkar ban ke ruh mein meri utar gae

wo mast git mausam-e-ishrat-fishaar ke

gahraiyon ko dil ki gham aabaad kar gae

larense-bagh kaif o latafat ke KHuld-zar

hai aasman pe kali ghaTaon ka izhdiham

hone lagi hai waqt se pahle hi aaj sham

duniya ki aankh nind se jis waqt jhuk gai

jab kaenat kho gai asrar-e-KHwab mein

sine mein ju-e-ashk hai mere ruki hui

ja kar use bahaunga kunj-e-gulab mein

hai aasman pe kali ghaTaon ka izhdiham

afkar ka hujum hai mere dimagh mein

baiTha hua hun subh se larense-bagh mein