ek hain hum

ek haiñ ham ektā ke giit gaa.eñ sāthiyo

desh kī dhartī ko mil-jul kar sajā.eñ sāthiyo

nafratoñ kī aag ab phūloñ ke man meñ kyoñ rahe

be-vatan yuuñ pyaar kī ḳhushbū chaman meñ kyoñ rahe

raat amāvas kī sadā apne vatan meñ kyoñ rahe

ban ke sūraj āsmāñ par jagmagā.eñ sāthiyo

apnī āñkhoñ meñ jalā.eñ ham mohabbat ke charāġh

sab ke zehnoñ se miTeñ guzre hue lamhoñ ke daaġh

dil kī dhartī par lagā.eñ phir na.e ḳhvāboñ ke baaġh

phir bahāroñ ke qadam is ghar meñ aa.eñ sāthiyo

qaum ke maz.hab ke jhagḌoñ se hameñ kyā kaam hai

hind ke haiñ ham sabhī hindostānī naam hai

dhyān se suniye samay kā ek hī paiġhām hai

krodh chhoḌeñ phuul ban ke muskurā.eñ sāthiyo

kab se ġhairoñ kī lagā.ī aag meñ jalte haiñ ham

kaise mūrakh haiñ parā.ī aag meñ jalte haiñ ham

ham-vatan haiñ bhaa.ī bhaa.ī aag meñ jalte haiñ ham

kyoñ jaleñ is aag meñ is ko bujhā.eñ sāthiyo

ek hain hum ekta ke git gaen sathiyo

desh ki dharti ko mil-jul kar sajaen sathiyo

nafraton ki aag ab phulon ke man mein kyon rahe

be-watan yun pyar ki KHushbu chaman mein kyon rahe

raat amawas ki sada apne watan mein kyon rahe

ban ke suraj aasman par jagmagaen sathiyo

apni aankhon mein jalaen hum mohabbat ke charagh

sab ke zehnon se miTen guzre hue lamhon ke dagh

dil ki dharti par lagaen phir nae KHwabon ke bagh

phir bahaaron ke qadam is ghar mein aaen sathiyo

qaum ke mazhab ke jhagDon se hamein kya kaam hai

hind ke hain hum sabhi hindostani nam hai

dhyan se suniye samay ka ek hi paigham hai

krodh chhoDen phul ban ke muskuraen sathiyo

kab se ghairon ki lagai aag mein jalte hain hum

kaise murakh hain parai aag mein jalte hain hum

ham-watan hain bhai bhai aag mein jalte hain hum

kyon jalen is aag mein is ko bujhaen sathiyo