ek husn-farosh laDki ke nam

mirī jaañ go tujhe dil se bhulāyā jā nahīñ saktā

magar ye baat maiñ apnī zabāñ par lā nahīñ saktā

maiñ tujh ko chāhtā huuñ vālihāna pyaar kartā huuñ

maiñ gaatā rahtā huuñ par ye naġhma gā nahīñ saktā

tujhe apnā banānā maujib-e-rāhat samajh kar bhī

tujhe apnā banā luuñ ye samajh meñ aa nahīñ saktā

banā saktā huuñ shab ko apne bistar kī tujhe zīnat

magar din meñ tire qasr-e-hasīñ tak jā nahīñ saktā

huā hai bār-hā ehsās mujh ko is haqīqat kā

tire nazdīk rah kar bhī maiñ tujh ko pā nahīñ saktā

mire dast-e-havas kī dastaras hai jism tak tere

maiñ terī ruuh kī gahrā.iyoñ tak jā nahīñ saktā

maiñ tere ras-bhare hoñToñ ko pyārī chuum saktā huuñ

magar maiñ tere dil par aah qabza pā nahīñ saktā

tire dil kī tamannā bhī karūñ to kis bharose par

maiñ ḳhud dargāh meñ tere ye tohfa lā nahīñ saktā

mirī majbūriyoñ ko bhī bahut kuchh daḳhl hai is meñ

tujhī ko morid-e-ilzām maiñ Thahrā nahīñ saktā

maiñ tujh se baḌh ke apnī aabrū ko pyaar kartā huuñ

maiñ apnī izzat-o-nāmūs ko Thukrā nahīñ saktā

tire māhaul kī pastī kā ta.ana duuñ tujhe kyūñ-kar

maiñ ḳhud māhaul se apne rihā.ī pā nahīñ saktā

meri jaan go tujhe dil se bhulaya ja nahin sakta

magar ye baat main apni zaban par la nahin sakta

main tujh ko chahta hun walihana pyar karta hun

main gata rahta hun par ye naghma ga nahin sakta

tujhe apna banana maujib-e-rahat samajh kar bhi

tujhe apna bana lun ye samajh mein aa nahin sakta

bana sakta hun shab ko apne bistar ki tujhe zinat

magar din mein tere qasr-e-hasin tak ja nahin sakta

hua hai bar-ha ehsas mujh ko is haqiqat ka

tere nazdik rah kar bhi main tujh ko pa nahin sakta

mere dast-e-hawas ki dastaras hai jism tak tere

main teri ruh ki gahraiyon tak ja nahin sakta

main tere ras-bhare honTon ko pyari chum sakta hun

magar main tere dil par aah qabza pa nahin sakta

tere dil ki tamanna bhi karun to kis bharose par

main KHud dargah mein tere ye tohfa la nahin sakta

meri majburiyon ko bhi bahut kuchh daKHl hai is mein

tujhi ko morid-e-ilzam main Thahra nahin sakta

main tujh se baDh ke apni aabru ko pyar karta hun

main apni izzat-o-namus ko Thukra nahin sakta

tere mahaul ki pasti ka tana dun tujhe kyun-kar

main KHud mahaul se apne rihai pa nahin sakta