ek katbe ki talash mein

havāoñ ke ta.āqub meñ

maiñ ik titlī se Takrā ke zamīñ par gir paḌā huuñ

paroñ kī gudgudāhaT se

mire māthe se ḳhuuñ bahne lagā hai

mujhe yaksāniyat se ḳhauf aatā hai

zyāda der ik hī kaifiyat meñ zinda rahnā kitnā mushkil hai

purāne mausamoñ kī nauha-ḳhvānī meñ

na.e mausam kī ḳhvāhish paidā hotī hai

maiñ apne halaq ke andar kuaañ tāmīr kartā huuñ

maiñ uḌ saktā huuñ

lekin merī be-tābī ko jaane kaun sī mauj-e-havā

āġhosh meñ legī

maiñ thak ke baiTh saktā huuñ

magar saarī zamīñ mere liye auñdhī paḌī hai

mirī sochoñ ke markaz se nikalte rāstoñ par

mere naqsh-e-pā ke be-tartīb ḳhākoñ meñ

ab āñkheñ ug ga.iiñ haiñ

havā ke haath meñ ik lauh merā ḳhvāb-nāma hai

havāoñ ke ta.āqub meñ agar maiñ mar gayā

to kaun merī lahad par us lauh ko katba banā.e.gā

hawaon ke taaqub mein

main ek titli se Takra ke zamin par gir paDa hun

paron ki gudgudahaT se

mere mathe se KHun bahne laga hai

mujhe yaksaniyat se KHauf aata hai

zyaada der ek hi kaifiyat mein zinda rahna kitna mushkil hai

purane mausamon ki nauha-KHwani mein

nae mausam ki KHwahish paida hoti hai

main apne halaq ke andar kuan tamir karta hun

main uD sakta hun

lekin meri be-tabi ko jaane kaun si mauj-e-hawa

aaghosh mein legi

main thak ke baiTh sakta hun

magar sari zamin mere liye aundhi paDi hai

meri sochon ke markaz se nikalte raston par

mere naqsh-e-pa ke be-tartib KHakon mein

ab aankhen ug gain hain

hawa ke hath mein ek lauh mera KHwab-nama hai

hawaon ke taaqub mein agar main mar gaya

to kaun meri lahad par us lauh ko katba banaega