ek KHayal ki rau mein

kahīñ sunā hai

ga.e zamānoñ meñ

log jab qāfiloñ kī sūrat

masāfatoñ ko ubuur karte

to qāfile meñ ik aisā hamrāh saath hotā

ki jo safar meñ

tamām logoñ ke pīchhe chaltā

aur us ke zimme ye kaam hotā

ki aage jaate musāfiroñ se

agar koī chiiz gir ga.ī ho

jo koī shai pīchhe rah ga.ī ho

to vo musāfir

tamām chīzoñ ko chuntā jaa.e

aur aane vaale kisī paḌāv meñ saarī chīzeñ

tamām aise musāfiroñ ke havāle kar de

ki jo manāzil kī chaah dil meñ liye shitābī se

apne raste to paaT aa.e

par apnī ujlat meñ kitnī chīzeñ

girā bhī aa.e gañvā bhī aa.e

maiñ sochtā huuñ

ki zindagānī ke is safar meñ

mujhe bhī aisā hī koī kirdār mil gayā hai

ki mere ham-rāh jo bhī ahbāb the

manāzil kī chaah dil meñ liye shitābī se

rāstoñ par bahut hī aage nikal ga.e haiñ

maiñ sab se pīchhe huuñ is safar meñ

so dekhtā huuñ ki rāste meñ

vafā muravvat ḳhulūs-o-īsār mehr-o-ulfat

aur is tarah kī bahut sī chīzeñ

jagah jagah par paḌī huī haiñ

maiñ apne ḳhud-sāḳhta usūloñ kī

zard gaThrī meñ saarī chīzeñ sameTtā huuñ

aur apne ehsās ke jilau meñ

har ik paḌāv pa jaane vāloñ ko DhūñDtā hoñ

par aisā lagtā hai

jaise mere tamām ahbāb manziloñ ko gale lagāne

bahut hī aage nikal ga.e haiñ

yā maiñ hī shāyad

vafā muravvat ḳhulūs-o-īsār mehr-o-ulfat

aur is tarah kī bahut sī chīzeñ sameTne maiñ ka.ī zamāne bitā chukā huuñ

kahin suna hai

gae zamanon mein

log jab qafilon ki surat

masafaton ko ubur karte

to qafile mein ek aisa hamrah sath hota

ki jo safar mein

tamam logon ke pichhe chalta

aur us ke zimme ye kaam hota

ki aage jate musafiron se

agar koi chiz gir gai ho

jo koi shai pichhe rah gai ho

to wo musafir

tamam chizon ko chunta jae

aur aane wale kisi paDaw mein sari chizen

tamam aise musafiron ke hawale kar de

ki jo manazil ki chah dil mein liye shitabi se

apne raste to paT aae

par apni ujlat mein kitni chizen

gira bhi aae ganwa bhi aae

main sochta hun

ki zindagani ke is safar mein

mujhe bhi aisa hi koi kirdar mil gaya hai

ki mere ham-rah jo bhi ahbab the

manazil ki chah dil mein liye shitabi se

raston par bahut hi aage nikal gae hain

main sab se pichhe hun is safar mein

so dekhta hun ki raste mein

wafa murawwat KHulus-o-isar mehr-o-ulfat

aur is tarah ki bahut si chizen

jagah jagah par paDi hui hain

main apne KHud-saKHta usulon ki

zard gaThri mein sari chizen sameTta hun

aur apne ehsas ke jilau mein

har ek paDaw pa jaane walon ko DhunDta hon

par aisa lagta hai

jaise mere tamam ahbab manzilon ko gale lagane

bahut hi aage nikal gae hain

ya main hi shayad

wafa murawwat KHulus-o-isar mehr-o-ulfat

aur is tarah ki bahut si chizen sameTne main kai zamane bita chuka hun