ek nai botiqa

suno

tumhāre phaphūñd lage jazbe

ab kisī ko muta.assir nahīñ kar sakte

kyūñki hurūf-e-tahajjī se lafzoñ kī

ek na.ī botīqā likhī jā rahī hai

jis meñ

miim se mohabbat daal se dard aur jiim se judā.ī nahīñ

shāyad in lafzoñ ko zanjīroñ se bāñdh kar

kisī andhe kueñ meñ pheñk diyā gayā hai

lafz bhī ab to sāzisheñ karne lage haiñ

mohabbat ko dīvār meñ chun kar

nafrateñ siina taan kar chaltī haiñ aur

dukh ḳhushiyoñ ko pattī pattī bikher kar khilkhilāte haiñ

aur to aur

ab parinde bhī āsmānoñ par nahīñ uḌte ki

kahīñ kisī nā-ma.alūm drone kī zad meñ aa kar

zamīñ-bos na ho jaa.eñ

titlī ke paroñ par niil paḌe hue haiñ aur

bhañvre dandanāte phirte haiñ

magar koī āsmāñ nahīñ phahTtā

is liye suno

lafzoñ kī na.ī botīqā likhī jā rahī hai to

aur kuchh nahīñ to tum

apnī aadhī adhūrī nazmeñ

is meñ pesh-e-lafz ke taur par shāmil kar do

is se pahle ki vo

kisī ātish-dān kā īñdhan baneñ yā

kisī kūḌe-dān se un ke purze

havā ke haath lag jaa.eñ

aur havā unheñ rail kī paTrī par pheñk aa.e

aur is se bhī pahle ki nazmeñ ḳhud-kushī kar leñ aur

lafzoñ kī nauha-ḳhvānī se duā.eñ rasta bhuul jaa.eñ

yā phir aao aisā kareñ ki

lafzoñ kī na.ī botīqā meñ

vahī purāne lafz hī kāsht kareñ ya.anī

miim se mohabbat

daal se dard

aur jiim se judā.ī

suno

tumhaare phaphund lage jazbe

ab kisi ko mutassir nahin kar sakte

kyunki huruf-e-tahajji se lafzon ki

ek nai botiqa likhi ja rahi hai

jis mein

mim se mohabbat dal se dard aur jim se judai nahin

shayad in lafzon ko zanjiron se bandh kar

kisi andhe kuen mein phenk diya gaya hai

lafz bhi ab to sazishen karne lage hain

mohabbat ko diwar mein chun kar

nafraten sina tan kar chalti hain aur

dukh KHushiyon ko patti patti bikher kar khilkhilate hain

aur to aur

ab parinde bhi aasmanon par nahin uDte ki

kahin kisi na-malum drone ki zad mein aa kar

zamin-bos na ho jaen

titli ke paron par nil paDe hue hain aur

bhanwre dandanate phirte hain

magar koi aasman nahin phahTta

is liye suno

lafzon ki nai botiqa likhi ja rahi hai to

aur kuchh nahin to tum

apni aadhi adhuri nazmen

is mein pesh-e-lafz ke taur par shamil kar do

is se pahle ki wo

kisi aatish-dan ka indhan banen ya

kisi kuDe-dan se un ke purze

hawa ke hath lag jaen

aur hawa unhen rail ki paTri par phenk aae

aur is se bhi pahle ki nazmen KHud-kushi kar len aur

lafzon ki nauha-KHwani se duaen rasta bhul jaen

ya phir aao aisa karen ki

lafzon ki nai botiqa mein

wahi purane lafz hi kasht karen yani

mim se mohabbat

dal se dard

aur jim se judai