ek nazm

maiñ

hayāt-e-muhmal kī justujū meñ

safar zamāne kā kar chukā huuñ

maiñ ik juārī kī tarah saarī bisāt apnī luTā chukā huuñ

maiñ aadmī ke aziim ḳhvāboñ kī saltanat bhī gañvā chukā huuñ

na jeb raḳht-e-safar kā tohfa liye hue hai

na zehn merā kisī tasavvur kā dukh uThāne

kisī mohabbat kā bojh sahne ke vāste iḳhtilāl meñ hai

maiñ fāteh kī tarah chalā thā

jo rāste meñ mile mujhe

vo teġh merī se kaT ga.e the

maiñ zā.iroñ ke libās meñ

qarz ḳhūñ-bahā kā utārne, sar muñDā ke yūñhī nikal gayā thā

ki lauT ā.ūñgā

ek din

phir batā.ūñgā maiñ hayāt-e-muhmal kā raaz kyā hai?

ye ḳhvāb hai yā ḳhayāl hai?

maiñ hayāt-e-muhmal kī justujū meñ

safar zamāne kā kar chukā huuñ

maiñ be-navā be-giyāh aur be-samar shajar huuñ

jo sau zamānoñ kī dhuul meñ be-basar bhikārī kī tarah

apnī hī āstīñ meñ laraz rahā hai!

main

hayat-e-muhmal ki justuju mein

safar zamane ka kar chuka hun

main ek juari ki tarah sari bisat apni luTa chuka hun

main aadmi ke azim KHwabon ki saltanat bhi ganwa chuka hun

na jeb raKHt-e-safar ka tohfa liye hue hai

na zehn mera kisi tasawwur ka dukh uThane

kisi mohabbat ka bojh sahne ke waste iKHtilal mein hai

main fateh ki tarah chala tha

jo raste mein mile mujhe

wo tegh meri se kaT gae the

main zairon ke libas mein

qarz KHun-baha ka utarne, sar munDa ke yunhi nikal gaya tha

ki lauT aaunga

ek din

phir bataunga main hayat-e-muhmal ka raaz kya hai?

ye KHwab hai ya KHayal hai?

main hayat-e-muhmal ki justuju mein

safar zamane ka kar chuka hun

main be-nawa be-giyah aur be-samar shajar hun

jo sau zamanon ki dhul mein be-basar bhikari ki tarah

apni hi aastin mein laraz raha hai!