ek nazm

ba-zāhir ajnabī ho tum

magar bosoñ kī be-kaifī batātī hai

ki ye vo zahr hai chakkhā hai jis ko bār-hā maiñ ne

na jaane jazb hai mere laboñ meñ kitne ruḳhsāroñ kī kaḌvāhaT

ye sab ḳhamyāza hai

us bosa-e-avval kā dil bhūlā nahīñ jis kī halāvat ko

maiñ us ko bār-hā samjhā chukā huuñ

māzī-e-marhūm kā mātam to kar sakte haiñ, vāpas lā nahīñ sakte

magar dil, dil hai is ko kaun samjhā.e

yaqīñ hai aaj tak us lamha-e-avval kī is ko bāzyābī kā

asīr-e-vahm hai itnā

gumāñ hone lagā hai reg-e-sahrā par bhī paanī kā

ise dīvāngī kah lo

farāz-e-tishnagī samjho

ba-zahir ajnabi ho tum

magar boson ki be-kaifi batati hai

ki ye wo zahr hai chakkha hai jis ko bar-ha main ne

na jaane jazb hai mere labon mein kitne ruKHsaron ki kaDwahaT

ye sab KHamyaza hai

us bosa-e-awwal ka dil bhula nahin jis ki halawat ko

main us ko bar-ha samjha chuka hun

mazi-e-marhum ka matam to kar sakte hain, wapas la nahin sakte

magar dil, dil hai is ko kaun samjhae

yaqin hai aaj tak us lamha-e-awwal ki is ko bazyabi ka

asir-e-wahm hai itna

guman hone laga hai reg-e-sahra par bhi pani ka

ise diwangi kah lo

faraaz-e-tishnagi samjho