ek nazm

maiñ ne DhūñDā tumheñ lamhoñ ke siyah-ḳhāne meñ

surmagīñ raat kā larzīda sitāra jaise

umr jis kī ho bas ik shab kī pareshāñ-nazarī

tum ne dekhā mujhe

ayyām ke chaTḳhe hue ā.īne meñ

sham.a-e-ḳhud-soḳhta kī tarah

pighalte hue lamha lamha

barq-pā vaqt kī har mauj hai

ḳhāshāk haiñ ye shām-o-sahar ye mah-o-sāl

koī larzīda sitāra

koī har lahza pighaltī huī sham-e-hastī

raat kī bāñhoñ meñ

chand dahke hue angāroñ kī sauġhāt liye

kisī maqsūm kisī ma.anī-e-mauhūm kā rishta DhūñDeñ

ye bhī mumkin nahīñ

ye bhī nahīñ taqdīr-e-vajūd

barq-pā vaqt kī har mauj hai

sīmāb se asnām tarashte haiñ kahāñ

halqa-dar-halqa habāboñ hī kī zanjīreñ haiñ

kyā kisī ḳhvāb ke chehre se uThā.e koī sangīn haqīqat kī naqāb

kyoñ kisī barq-sifat lamhe kā dāman thāme

kis liye kho.e hue vaqt kā mātam

ki ye mātam-kada fardā bhī hai imroz bhī

dīroz bhī hai

main ne DhunDa tumhein lamhon ke siyah-KHane mein

surmagin raat ka larzida sitara jaise

umr jis ki ho bas ek shab ki pareshan-nazari

tum ne dekha mujhe

ayyam ke chaTKHe hue aaine mein

shama-e-KHud-soKHta ki tarah

pighalte hue lamha lamha

barq-pa waqt ki har mauj hai

KHashak hain ye sham-o-sahar ye mah-o-sal

koi larzida sitara

koi har lahza pighalti hui sham-e-hasti

raat ki banhon mein

chand dahke hue angaron ki saughat liye

kisi maqsum kisi mani-e-mauhum ka rishta DhunDen

ye bhi mumkin nahin

ye bhi nahin taqdir-e-wajud

barq-pa waqt ki har mauj hai

simab se asnam tarashte hain kahan

halqa-dar-halqa hababon hi ki zanjiren hain

kya kisi KHwab ke chehre se uThae koi sangin haqiqat ki naqab

kyon kisi barq-sifat lamhe ka daman thame

kis liye khoe hue waqt ka matam

ki ye matam-kada farda bhi hai imroz bhi

diroz bhi hai