ek nazm sirf tumhaare liye

mujh meñ ātish jo chhupī hai use bhaḌkāne meñ

vasl se ziyāda tire hijr kī ḳhvāhish hai mujhe

jism aur jaan se aage bhī koī duniyā hai

aur un rāhoñ meñ tanhā hī bhaTaknā hai mujhe

aur un rāhoñ meñ tanhā hī bhaTaknā hai mujhe

tujh ko tasḳhīr-e-badan kī hī rahī hai ḳhvāhish

aur maiñ ruuh ke saude ke liye sochtī huuñ

tujh ko mālūm hai jo shai bhī mayassar aa jaa.e

us kī phir qadr kahāñ rahtī hai

maiñ tujhe sauñp duuñ ḳhud ko to ḳhasāra hai bahut

Dūbne ke liye āñkhoñ kā kināra hai bahut

kyā ye mumkin hai ki tū rañg meñ bhī rañg le apne

aur dāman pe mire daaġh bhī koī na lage

vasl ke baad to hairat meñ kamī aatī hai

phir junūñ-ḳhezī kī shiddat meñ kamī aatī hai

hairat-e-ishq kī gum-nām musāfir huuñ mujhe

aisā radd kar mirī hairat meñ izāfa ho jaa.e

aur is ishq kī shiddat meñ izāfa ho jaa.e

mujh mein aatish jo chhupi hai use bhaDkane mein

wasl se ziyaada tere hijr ki KHwahish hai mujhe

jism aur jaan se aage bhi koi duniya hai

aur un rahon mein tanha hi bhaTakna hai mujhe

aur un rahon mein tanha hi bhaTakna hai mujhe

tujh ko tasKHir-e-badan ki hi rahi hai KHwahish

aur main ruh ke saude ke liye sochti hun

tujh ko malum hai jo shai bhi mayassar aa jae

us ki phir qadr kahan rahti hai

main tujhe saunp dun KHud ko to KHasara hai bahut

Dubne ke liye aankhon ka kinara hai bahut

kya ye mumkin hai ki tu rang mein bhi rang le apne

aur daman pe mere dagh bhi koi na lage

wasl ke baad to hairat mein kami aati hai

phir junun-KHezi ki shiddat mein kami aati hai

hairat-e-ishq ki gum-nam musafir hun mujhe

aisa radd kar meri hairat mein izafa ho jae

aur is ishq ki shiddat mein izafa ho jae