ek riyazat ye bhi

vahī dariyā kināre

roz apnī baañs kī bansī liye baiThā huā vo shaḳhs

kitnī be-niyāzī se

har ik lamhe ko apnī ḳhush-dilī se daad detā hai

ki jis ke rū-e-raushan par qanā.at morchhal jhaltī huī motī luTātī hai

sahar-tā-shām lahroñ se vo apnī baat kahtā hai

havāoñ kī madhur sargoshiyoñ par khilkhilātā hai

parindoñ ke suhāne chahchahoñ par jhuum uThtā hai

kisī āvāz kī aahaT pe kajrī gungunātā hai

magar us kī nazar Dorī kī har jumbish pe rahtī hai

koī machhlī phañsī to is ke siine meñ

ka.ī rañgoñ kī sub.heñ daf.atan marpāsh hotī haiñ

magar aisā bhī hotā hai

kisī din haath ḳhālī apne ghar vo lauT jaatā hai

ka.ī ma.asūm āñkheñ jab savālī ban ke uThtī haiñ

vahī mānūs sī ik muskurāhaT is ke chehre kī

kisī nannhī sī machhlī kī tarah ik jast letī hai

shikasta jhoñpaḌe meñ ek bijlī kauñd jaatī hai

wahi dariya kinare

roz apni bans ki bansi liye baiTha hua wo shaKHs

kitni be-niyazi se

har ek lamhe ko apni KHush-dili se dad deta hai

ki jis ke ru-e-raushan par qanaat morchhal jhalti hui moti luTati hai

sahar-ta-sham lahron se wo apni baat kahta hai

hawaon ki madhur sargoshiyon par khilkhilata hai

parindon ke suhane chahchahon par jhum uThta hai

kisi aawaz ki aahaT pe kajri gungunata hai

magar us ki nazar Dori ki har jumbish pe rahti hai

koi machhli phansi to is ke sine mein

kai rangon ki subhen dafatan marpash hoti hain

magar aisa bhi hota hai

kisi din hath KHali apne ghar wo lauT jata hai

kai masum aankhen jab sawali ban ke uThti hain

wahi manus si ek muskurahaT is ke chehre ki

kisi nannhi si machhli ki tarah ek jast leti hai

shikasta jhonpaDe mein ek bijli kaund jati hai