ek sal

'ishq kyā chiiz hai ulfat kī haqīqat kyā hai

tere hamrāh guzārā huā ik saal faqat

jo tire naam se mansūb kiyā thā maiñ ne

aaj us saal kī Thahrī huī ye āḳhirī shaam

apne biite hue lamhoñ kī kasak le aa.ī

merī āñkhoñ meñ ye nādīda chamak le aa.ī

vo mire arz-e-tamanna kī dil-āvez sadā

tū jise sun ke mire paas chalā aayā thā

dil bhī pahlū meñ mirī jaan uThā laayā thā

tū mirī ziist kā hāsil tū masīhā-e-vafā

tū mohabbat kā amiiñ 'ishq kā shā.ista gulāb

tū ne ulfat ke ka.ī baab sikhā.e jānāñ

merī āñkhoñ meñ hasīñ ḳhvāb sajā.e jānāñ

maiñ tire saath bitā.e hue lamhāt ke rang

apnī āñkhoñ meñ sajā.e hue baiThī huuñ abhī

chāñdnī raat ye bele kī mahaktī ḳhushbū

apne āñchal meñ basā.e hue baiThī huuñ abhī

terī qurbat kī hasīñ raat milī hai mujh ko

itne barsoñ meñ ye sauġhāt milī hai mujh ko

raat Dhal jaa.e na har roz kī sūrat aa jā

aaj mumkin nahīñ inkār kī sūrat aa jā

mirī āñkhoñ meñ mire ḳhvāb muqaffal kar de

aaj kī raat mirā 'ishq mukammal kar de

'ishq kya chiz hai ulfat ki haqiqat kya hai

tere hamrah guzara hua ek sal faqat

jo tere nam se mansub kiya tha main ne

aaj us sal ki Thahri hui ye aaKHiri sham

apne bite hue lamhon ki kasak le aai

meri aankhon mein ye nadida chamak le aai

wo mere arz-e-tamanna ki dil-awez sada

tu jise sun ke mere pas chala aaya tha

dil bhi pahlu mein meri jaan uTha laya tha

tu meri zist ka hasil tu masiha-e-wafa

tu mohabbat ka amin 'ishq ka shaista gulab

tu ne ulfat ke kai bab sikhae jaanan

meri aankhon mein hasin KHwab sajae jaanan

main tere sath bitae hue lamhat ke rang

apni aankhon mein sajae hue baiThi hun abhi

chandni raat ye bele ki mahakti KHushbu

apne aanchal mein basae hue baiThi hun abhi

teri qurbat ki hasin raat mili hai mujh ko

itne barson mein ye saughat mili hai mujh ko

raat Dhal jae na har roz ki surat aa ja

aaj mumkin nahin inkar ki surat aa ja

meri aankhon mein mere KHwab muqaffal kar de

aaj ki raat mera 'ishq mukammal kar de