ek shikwa

tirā dil zarā bhī zālim jo vafā-shi.ār hotā

tujhe merī qadr hotī tujhe mujh se pyaar hotā

ye mazā thā āshiqī kā ki ye hāl-e-zār hotā

na tujhe qarār hotā na mujhe qarār hotā

tirī be-ruḳhī ke Dar se mirī jaan par ban aa.ī

jo zarā maiñ khiñch ke rahtā tujhe nāgavār hotā

maiñ ġham-e-jahāñ se ghabrā ke bas itnā chāhtā thā

koī chārāgar na hotā koī ġham-gusār hotā

mirā hāl-e-zār sun kar kisī dil ko rahm aatā

mirī be-qarāriyoñ par koī be-qarār hotā

jo zarā sī der ko bhī maiñ judā kisī se rahtā

to zarā sī der meñ bhī mirā intizār hotā

idhar apnī kāmyābī se ye hotī merī hālat

ġham-e-hijr to na hotā ġham-e-vasl-e-yār hotā

magar is ko kyā karūñ maiñ ki nasīb meñ likhā thā

tire baḳht-e-bad na hote to tujhe qarār hotā

maiñ navā-e-ġham meñ apnī vo asar kahīñ se laatā

tire dil meñ huuk uThtī jo maiñ be-qarār hotā

maiñ use bhī apne hī dil kī tarah ḳharāb kartā

tire dil pe kaash zālim mirā iḳhtiyār hotā

mirā is ġhazal se matlab thā 'jalīl' sirf itnā

maiñ kisī se shikva kartā koī sharmsār hotā

tera dil zara bhi zalim jo wafa-shiar hota

tujhe meri qadr hoti tujhe mujh se pyar hota

ye maza tha aashiqi ka ki ye haal-e-zar hota

na tujhe qarar hota na mujhe qarar hota

teri be-ruKHi ke Dar se meri jaan par ban aai

jo zara main khinch ke rahta tujhe nagawar hota

main gham-e-jahan se ghabra ke bas itna chahta tha

koi chaaragar na hota koi gham-gusar hota

mera haal-e-zar sun kar kisi dil ko rahm aata

meri be-qarariyon par koi be-qarar hota

jo zara si der ko bhi main juda kisi se rahta

to zara si der mein bhi mera intizar hota

idhar apni kaamyabi se ye hoti meri haalat

gham-e-hijr to na hota gham-e-wasl-e-yar hota

magar is ko kya karun main ki nasib mein likha tha

tere baKHt-e-bad na hote to tujhe qarar hota

main nawa-e-gham mein apni wo asar kahin se lata

tere dil mein huk uThti jo main be-qarar hota

main use bhi apne hi dil ki tarah KHarab karta

tere dil pe kash zalim mera iKHtiyar hota

mera is ghazal se matlab tha 'jalil' sirf itna

main kisi se shikwa karta koi sharmsar hota