ek tote ki fariyaad pinjre mein

haa.e taqdīr ki maiñ aan phañsā pinjre meñ

ab nahīñ ḳhaak bhī jiine kā maza pinjre meñ

chhuT ga.e qaid meñ mujh se mire biivī bachche

koī sāthī hai na ġham-ḳhvār mirā pinjre meñ

ghar kī dīvāreñ bhī afsos haiñ ūñchī ūñchī

kabhī aatī nahīñ jangal kī havā pinjre meñ

taaze taaze haiñ kahāñ aaj vo phal bāġhoñ ke

miltī hai sūkhī saḌī mujh ko ġhizā pinjre meñ

koī amrūd nahīñ aam nahīñ ber nahīñ

kabhī kelā bhī na khāne ko milā pinjre meñ

haa.e is shāḳh se us shāḳh pe uḌ kar jaanā

yaad aatā hai vo uḌne kā mazā pinjre meñ

tīliyoñ se mirā sar phūTtā hai vaa.e nasīb

choT lagtī hai jo uḌtā huuñ zarā pinjre meñ

ab to sab bhuul gayā baiTh ke Teñ Teñ karnā

chup paḌā rahtā huuñ maiñ but sā banā pinjre meñ

kahte haiñ chhoTe baḌe ghar ke miyāñ miTThū sab

vaah ye ḳhuub laqab mujh ko milā pinjre meñ

maiñ samajhtā huuñ jo matlab hai miyāñ miTThū kā

bāvlā jāntī hai ḳhalq-e-ḳhudā pinjre meñ

isī hālat meñ guzar jā.eñge baaqī din bhī

ik din aa jā.egī bas merī qazā pinjre meñ

rahm kar rahm kar allāh mire haal pe tū

mil chukī ab to mujhe ḳhuub sazā pinjre meñ

terī qudrat hai baḌī jald chhuḌā de mujh ko

dam mirā jiine se rahtā hai ḳhafā pinjre meñ

hae taqdir ki main aan phansa pinjre mein

ab nahin KHak bhi jine ka maza pinjre mein

chhuT gae qaid mein mujh se mere biwi bachche

koi sathi hai na gham-KHwar mera pinjre mein

ghar ki diwaren bhi afsos hain unchi unchi

kabhi aati nahin jangal ki hawa pinjre mein

taze taze hain kahan aaj wo phal baghon ke

milti hai sukhi saDi mujh ko ghiza pinjre mein

koi amrud nahin aam nahin ber nahin

kabhi kela bhi na khane ko mila pinjre mein

hae is shaKH se us shaKH pe uD kar jaana

yaad aata hai wo uDne ka maza pinjre mein

tiliyon se mera sar phuTta hai wae nasib

choT lagti hai jo uDta hun zara pinjre mein

ab to sab bhul gaya baiTh ke Ten Ten karna

chup paDa rahta hun main but sa bana pinjre mein

kahte hain chhoTe baDe ghar ke miyan miTThu sab

wah ye KHub laqab mujh ko mila pinjre mein

main samajhta hun jo matlab hai miyan miTThu ka

bawla jaanti hai KHalq-e-KHuda pinjre mein

isi haalat mein guzar jaenge baqi din bhi

ek din aa jaegi bas meri qaza pinjre mein

rahm kar rahm kar allah mere haal pe tu

mil chuki ab to mujhe KHub saza pinjre mein

teri qudrat hai baDi jald chhuDa de mujh ko

dam mera jine se rahta hai KHafa pinjre mein