ek wajudi dost ke nam

tum ne jitne bhī badle the apne aap se aur phir apne jaisoñ se

ik ik kar ke puure dil se chukā bhī liye haiñ

apne aap se guttham-gutthā hone meñ hī sab jañgoñ kī lazzat hai

lazzat, jis kā shāyad kuchh bhī ḳharch nahīñ hai

aur ye jañg ki jis meñ kuchh aisī nazmoñ kā māl-e-ġhanīmat mil jaatā hai

jis par achchhī-ḳhāsī umr guzar jaatī hai

lekin masnūī dardoñ se kuchh nahīñ hotā

pyāre dost

ḳhilqat terī napī-tulī bātoñ ke ūñche darvāzoñ meñ

ramz bharī gambhīr aur gahrī āvāzoñ meñ

ek na.e aadam ke janm kī ḳhātir

terī nazmoñ aur aqīdoñ ke bistar ke tavāf meñ hai

lekin tere sab jazboñ kī shiddat

ik biyāh ke be-rañg lihāf meñ hai

tū jo zard kitāboñ ke jaise par jaane kab se

kaise kaise āsanoñ meñ

jhūTī shahvat ke va.ade meñ leTā hai

apne she.arī hizyānoñ ke ilhāmoñ meñ haklātā hai

na.e janam ke bashārat ke is bāvle ġhash meñ

go na.e ḳhvāboñ kī rānoñ meñ niglātā hai

tum ne jitne bhi badle the apne aap se aur phir apne jaison se

ek ek kar ke pure dil se chuka bhi liye hain

apne aap se guttham-guttha hone mein hi sab jangon ki lazzat hai

lazzat, jis ka shayad kuchh bhi KHarch nahin hai

aur ye jang ki jis mein kuchh aisi nazmon ka mal-e-ghanimat mil jata hai

jis par achchhi-KHasi umr guzar jati hai

lekin masnui dardon se kuchh nahin hota

pyare dost

KHilqat teri napi-tuli baaton ke unche darwazon mein

ramz bhari gambhir aur gahri aawazon mein

ek nae aadam ke janm ki KHatir

teri nazmon aur aqidon ke bistar ke tawaf mein hai

lekin tere sab jazbon ki shiddat

ek biyah ke be-rang lihaf mein hai

tu jo zard kitabon ke jaise par jaane kab se

kaise kaise aasanon mein

jhuTi shahwat ke wade mein leTa hai

apne sheari hizyanon ke ilhamon mein haklata hai

nae janam ke bashaarat ke is bawle ghash mein

go nae KHwabon ki ranon mein niglata hai